యువ నటుడు నవీన్ పొలిశెట్టి ఓ నెటిజన్ను ఆశ్చర్యపరిచారు. ఈమేరకు వీడియో కాల్‌ చేసి అతడి కుటుంబసభ్యులతో మాట్లాడారు. ఇటీవల కరోనా బారినపడి తన తండ్రి కన్నుమూశారని, అప్పటి నుంచి తన తల్లి బాధతో కుంగిపోతోందని మే 5న సాయి స్మరణ్‌ నెటిజన్ ఓ ట్వీట్ పెట్టాడు. అంతేకాకుండా 'జాతిరత్నాలు' చూసిన తర్వాత ఆమె కొంత ఊరట పొందారని నవీన్ పొలిశెట్టిని ట్యాగ్ చేశాడు. అయితే సాయి పెట్టిన ట్వీట్ చూసిన నవీన్.. 'మనకెంతో ఇష్టమైన వాళ్లు చనిపోతే ఆ బాధ ఎలా ఉంటుందో నాకు తెలుసు. మీ అమ్మకు 'జాతిరత్నాలు' కొంతవరకూ ఊరట కలిగించినందుకు ఆనందిస్తున్నా. మీ వివరాలను నాకు పంపించండి త్వరలోనే సర్ప్రైజ్ చేస్తా' అని రిప్లై ఇచ్చారు.
నెటిజన్ను సర్ప్రైజ్ చేసిన 'జాతిరత్నాలు' నవీన్
తనను ట్యాగ్ చేసిన ట్వీట్ పెట్టిన ఓ నెటిజన్ను సర్ప్రైజ్ చేశారు జాతిరత్నాలు ఫేమ్ నవన్ పొలిశెట్టి. ఇంతకీ ఏంటా సర్ప్రైజ్? నవీన్ నెటిజన్కు ఫోన్ చేయడానికి కారణమేంటి?
నవీన్ పొలిశెట్టి
ఈ నేపథ్యంలోనే ఇటీవల నవీన్.. సాయికి ఫోన్ చేశారు. సాయి వాళ్లమ్మతో కొంతసేపు వీడియో కాల్‌లో మాట్లాడారు. ఈ విషయాన్ని తెలియజేస్తూ ఓ ట్వీట్ పెట్టారు. 'అమ్మ మరలా నవ్వింది. బాధ నుంచి బయటపడడం కోసం ప్రేమ ఎంతో అవసరం. అవసరమైన వారికి చేతనైనంత సాయం చేయండి' అని ట్వీట్ పెట్టారు.
'జాతిరత్నాలు’' విషయానికి వస్తే అనుదీప్‌ దర్శకత్వం వహించిన ఈ కామెడీ ఎంటర్‌టైనర్‌లో నవీన్ పొలిశెట్టి, రాహుల్‌, ప్రియదర్శి ప్రధాన పాత్రలు పోషించారు. ఫరియా అబ్దుల్లా కథానాయిక. వైజయంతి మూవీస్‌ బ్యానర్‌పై నాగ్‌ అశ్విన్ నిర్మించారు.