సినిమా అంటే రంగుల లోకం మాత్రమే కాదు మాయా ప్రపంచం కూడా. ఇందుకే అక్కడ కంటికి కనిపించేవన్నీ నిజం కాదు. ఈ విషయాన్ని మరోసారి నిజం చేశారు మెగాస్టార్ చిరంజీవి. నిన్న మొన్నటి వరకు బాక్సాఫీస్ను షేక్ చేసిన మెగా బాస్.. ఈ మధ్య కాలంలో సోషల్మీడియాలోనూ సంచలనాలు సృష్టిస్తున్నారు. ఆన్లైన్ ప్రపంచంలోకి ఆలస్యంగా అడుగుపెట్టినా అప్డేట్స్ అందించడంలో జోరుగా ఉంటున్నారు. ఇందులో భాగంగా ఇటీవలే తాను గుండుతో ఉన్న లుక్ను పోస్ట్ చేసి అభిమానులను ఆశ్చర్యపరిచారు.
గత కొద్ది రోజులుగా ఇది నెట్టింట్లో వైరల్గా మారింది. ఇందులో నున్నటి గుండు, నల్లటి కళ్లద్దాలతో చిరు అర్బన్ మాంక్ స్టైల్‌లో కనిపించారు. ఈ లుక్ను అభిమానులు లైక్‌లతో ముంచెత్తారు. అంతేకాకుండా చిరు నిజంగా గుండు చేయించుకున్నారా..? యాప్‌ సహాయంతో అలా కనిపించారా..? ఫొటో ఎడిటింగ్‌ మహిమా? అనే సందేహాలతో తలమునకలయ్యారు నెటిజన్లు. అయితే వీరి ప్రశ్నలన్నిటికీ చిరు ఈ రోజు సమాధానమిచ్చారు.