కరోనా విస్తరిస్తోన్న నేపథ్యంలో పలు దేశాలు లాక్‌డౌన్‌ను ప్రకటించాయి. దీంతో ప్రజలు తీవ్ర ఇబ్బందులు పడుతున్నారు. ముఖ్యంగా మందుబాబులు, సిగరెట్లు అలవాటు ఉన్న వారి పరిస్థితి వర్ణణాతీతం. తాజాగా ఫ్రాన్స్‌కు చెందిన ఓ వ్యక్తి సిగరెట్ల కోసం ఏకంగా స్పెయిన్కు వెళ్లాడు. ఇరు దేశాలను కలిపే పైరినీస్ పర్వతం నుంచి వెళ్తూ, చిక్కుకున్న అతడ్ని రక్షించారు పోలీసులు. కరోనా లాక్డౌన్ నిబంధనలు ఉల్లంఘించినందుకు జరిమానా వేశారు.
సాహస యాత్ర...
ఆ వ్యక్తి శనివారం దక్షిణ ఫ్రాన్స్‌లోని పెర్పిగ్నన్ నుంచి స్పెయిన్‌లోని లా జోంక్వెరాకు సిగరెట్ల కోసం కారులో బయలు దేరాడు. కానీ పోలీసులు ఆ వ్యక్తిని చెక్‌పోస్ట్‌ వద్ద నిలిపివేశారు. దీంతో అతను రెండు దేశాలను కలిపే పర్వతం నుంచి కాలినడకన వెళ్లాలని నిశ్చయించుకున్నాడు. అనుకున్నదే తడవుగా అతను పర్వతం ప్రయాణం కొనసాగించాడు. కానీ దారి మధ్యలోనే అతడు పడిపోయినట్లు గుర్తించిన అధికారులు హెలికాఫ్టర్‌ సాయంతో రక్షించారు.