కుటుంబంతో కలిసి ట్రంప్ క్రిస్మస్ సంబరాలు

అగ్రరాజ్య అధ్యక్షుడు డొనాల్డ్ ట్రంప్ క్రిస్మస్​ను ఘనంగా జరుపుకున్నారు. కుటుంబ సభ్యులతో కలిసి వేడుకల్లో పాల్గొన్నారు ట్రంప్. తొలుత ట్రంప్ దంపతులు అమెరికన్లకు క్రిస్మస్ శుభాకాంక్షలు చెప్పారు.

అమెరికా అధ్యక్షుడు డొనాల్డ్ ట్రంప్ క్రిస్మస్​ వేడుకలను ఘనంగా జరుపుకున్నారు. ఫ్లోరిడాలోని పామ్ బీచ్​లో గల తన ప్రైవేట్ క్లబ్​లో కుటుంబ సభ్యులతో సరదాగా గడిపారు. తొలుత కుటుంబంతో కలిసి బీచ్​లోని బాప్టిస్ట్ చర్చికి వెళ్లారు. ఈ సందర్భంగా ట్రంప్ దంపతులు ప్రత్యేక పార్థనలు చేశారు. ట్రంప్ అతని భార్య మెలానియాను 2005లో ఇదే చర్చిలో వివాహం చేసుకున్నారు ట్రంప్​.

'కుటుంబాలకు దూరంగా ఉండే దేశ సైనికుల కోసం, ప్రపంచ శాంతి కోసం ప్రార్థనలు చేశా. దేశాల మధ్య శాంతి ఉంటే ప్రపంచం ఆనందంగా ఉంటుంది.' అని ఈ సందర్భంగా క్రిస్మస్ సందేశమిచ్చారు ట్రంప్. 'అధ్యక్షుడి తరఫున, నా తరఫున ప్రతి ఒక్క అమెరికా పౌరుడికి క్రిస్మస్ శుభాకాంక్షలు.' అన్నారు అమెరికా ప్రథమ పౌరురాలు మెలానియా. ఈ మేరకు సంయుక్తంగా ఒక వీడియో విడుదల చేశారు ట్రంప్ దంపతులు.