'ప్రాంక్​' వేటలో.. ప్రాణాలు కోల్పోయి..!

అమెరికాలో.. ప్రాంక్​ వీడియో నేపథ్యంలో ఓ యూట్యూబర్​ ప్రాణాలు కోల్పోయాడు. నాష్​విల్లెలోని ఓ పార్క్​లోని పార్కింగ్​ ప్రాంతంలో ఈ దోపిడీ ప్రాంక్​ చేశాడు. అయితే అది ప్రాంక్​ అని తెలియక.. అక్కడే ఉన్న ఓ వ్యక్తి ఆత్మరక్షణ కోసం ఆ యూట్యూబర్​పై కాల్పులు జరిపాడు. అతను అక్కడిక్కడే మరణించాడు.

సరదాగా అపరిచితులపై ప్రాంక్‌ చేయబోయి.. ఓ యూట్యూబర్‌ ప్రాణాలు కోల్పోయిన ఘటన అమెరికాలోని నాష్‌విల్లె నగరంలో జరిగింది.

ప్రాంక్​ కాస్తా విషాదంగా..

యూఎస్‌ఏలోని నాష్​విల్లెకు చెందిన 20 ఏళ్ల తిమోతి విల్క్స్‌ అతడి స్నేహితుడు కలిసి తమ యూట్యూబ్‌ ఛానల్‌ కోసం 'దోపిడీ' చేసే ఒక ప్రాంక్‌ వీడియో రూపొందించాలనుకున్నారు. ఈ మేరకు వీరిద్దరు కలిసి అడ్వంచర్‌ పార్క్‌ వద్ద ఉన్న పార్కింగ్‌ ప్రాంతాన్ని ఎంచుకున్నారు. ప్రాంక్‌లో భాగంగా గత శనివారం పార్కింగ్‌ ప్రాంతంలో నిల్చున్న ఓ గుంపును కత్తి చూపించి దోపిడీకి యత్నించారు. అయితే, ఆ గుంపులో ఉన్న 23ఏళ్ల స్టార్న్స్‌ జూనియర్‌ అనే వ్యక్తి అది ప్రాంక్‌ అని తెలియక.. తన వద్ద ఉన్న తుపాకితో కాల్పులు జరిపాడు.

ఆత్మ రక్షణ కోసమే కాల్పులు..

ఈ ఘటనలో తిమోతి అక్కడికక్కడే మృతి చెందాడు. సమాచారం అందుకున్న పోలీసులు ఘటనాస్థలికి చేరుకొని విచారణ జరిపారు. స్టార్న్స్‌ కేవలం ఆత్మరక్షణ కోసమే తిమోతిపై కాల్పులు జరిపాడని వెల్లడించారు. ఈ కేసులో ఎవరిపై ఇంకా చర్యలు తీసుకోలేదని.. విచారణ కొనసాగిస్తామని పోలీసులు చెప్పారు.

ఇవీ చదవండి:అమెరికా హోటల్​లో కాల్పుల కలకలం