మాయమాటలతో ఓ వ్యక్తిని నమ్మించి ఇంట్లో నుంచి రూ.4 లక్షలు తెప్పించుకుని అతనిని ఏమార్చి పరారైన వ్యక్తిని ఏపీలోని కర్నూలు జిల్లా గోస్పాడు మండలం యాళ్లూరులో పోలీసులు పట్టుకున్నారు. ఈ నెల 22న యాళ్లూరులో మంజుల శ్రీనివాసులు హోటల్‌కు ఓ గుర్తుతెలియని వ్యక్తి రాత్రి 8.30కి వచ్చి తాను రియల్ ఎస్టేట్ వ్యాపారం చేస్తుంటానని పరిచయం చేసుకున్నాడు. 'నీ వద్దనున్న డబ్బులిస్తే రెండింతలు చేసి ఇచ్చేవారు ఉన్నారు' అని నమ్మబలికాడు. అతని మాటలను నమ్మిన శ్రీనివాసులు... ఇంట్లో ఉన్న రూ.4 లక్షలను తెచ్చివ్వగా... అతను కొద్దిసేపు చరవాణుల్లో మాట్లాడినట్లు నటించాడు.
నగదు రెట్టింపు చేసేవారు రావడం ఆలస్యమయ్యేటట్లు ఉందని, కొద్దిసేపు నిద్రపోతానని, బెడ్‌షీటు తెచ్చివ్వాలని శ్రీనివాసులును కోరాడు. అతను బెడ్‌షీట్‌ తెచ్చేందుకు లోపలికి వెళ్లగా ఇదే అవకాశంగా డబ్బుతో సహా ఉడాయించాడు. మోసపోయినట్లు గ్రహించిన శ్రీనివాసులు... పోలీసులకు ఫిర్యాదు చేశారు. పోలీసులు కేసు నమోదు చేసి గాలింపు చర్యలు చేపట్టారు. శుక్రవారం ఉదయం నంద్యాల నుంచి చాపిరేవుల హైవే ప్రాంతంలో నిందితుడు ఉండగా పట్టుకున్నట్లు పోలీసులు తెలిపారు.