రామోజీ గ్రూపు సంస్థల ఛైర్మన్‌ రామోజీరావు మనవరాలు బృహతి పరిణయ వేడుక రామోజీ ఫిల్మ్‌ సిటీ వేదికగా ఘనంగా జరిగింది. దండమూడి అమర్ మోహన్‌దాస్‌-అనితల కుమారుడు వెంకట్ అక్షయ్.. ఈనాడు ఎండీ సీహెచ్‌. కిరణ్-శైలజ దంపతుల ద్వితీయ కుమార్తె బృహతి శనివారం రాత్రి 12 గంటల 18 నిమిషాల శుభ ముహూర్తాన వివాహ బంధంతో ఒక్కటయ్యారు.
అంతకుముందు నూతన వధూవరులను వివిధ రంగాలకు చెందిన ప్రముఖులు రామోజీ ఫిల్మ్‌సిటీకి విచ్చేసి ఆశీర్వదించారు. భారత ఉపరాష్ట్రపతి వెంకయ్యనాయుడు దంపతులు, సుప్రీంకోర్టు ప్రధాన న్యాయమూర్తి జస్టిస్ ఎన్‌వీ రమణ దంపతులతో పాటు తెలంగాణ ముఖ్యమంత్రి కేసీఆర్‌, తెదేపా అధినేత చంద్రబాబు నాయుడు, కేంద్రమంత్రి కిషన్‌ రెడ్డి, జనసేన అధినేత పవన్‌ కల్యాణ్‌, అగ్ర కథానాయకులు రజనీకాంత్‌, చిరంజీవి విచ్చేసి కొత్త జంటకు శుభాకాంక్షలు తెలిపారు.
వీరితో పాటు తెలంగాణ మంత్రులు మహమూద్‌ అలీ, హరీశ్‌రావు, ఇంద్రకరణ్‌ రెడ్డి, జగదీశ్‌ రెడ్డి, శ్రీనివాస్‌ గౌడ్‌, తెరాస ఎంపీలు నామా నాగేశ్వరరావు, సంతోశ్ కుమార్‌, తెదేపా ప్రధాన కార్యదర్శి నారా లోకేశ్‌, మాజీ మంత్రి దేవినేని ఉమామహేశ్వరరావు, వైకాపా ఎంపీ రఘురామకృష్ణరాజు, సినీ ప్రముఖులు మోహన్‌బాబు, అల్లు అరవింద్‌, మురళీమోహన్‌, దర్శకుడు రాజమౌళి, రాజశేఖర్‌-జీవిత దంపతులు, నిర్మాత సురేశ్బాబు, మంచు విష్ణు దంపతులు, తనికెళ్ల భరణి, అశ్వనీదత్‌, సాయికుమార్‌, రాజేంద్రప్రసాద్‌, శ్యామ్‌ప్రసాద్‌ రెడ్డి, బ్యాడ్మింటన్‌ కోచ్‌ పుల్లెల గోపీచంద్‌, బ్యాడ్మింటన్‌ స్టార్‌ పీవీ సింధు, జూపల్లి రామేశ్వరరావు, సీపీఐ ఏపీ కార్యదర్శి రామకృష్ణ తదితర ప్రముఖులు ఈ వేడుకకు హాజరయ్యారు.