త్వరలో మద్యం ధరలు పెంపు..?

రాష్ట్రంలో మద్యం ప్రియుల జేబుకు చిల్లులు పడనున్నాయి. త్వరలో ధరలు పెంచడం ద్వారా అధిక  రాబడి ప్రభుత్వ ఖజానాలో జమ కానుంది. మున్సిపల్ ఎన్నికల తర్వాత ధర పెంచేందుకు అబ్కారీ శాఖ కసరత్తు చేస్తోంది. ఇప్పుడున్న ధరలకు 15శాతానికి తక్కువ కాకుండా పెంచాలని ఎక్సైజ్ శాఖ యోచిస్తోంది.

మద్యం అమ్మకాల ద్వారా మరింత రాబడిని ఖజానాకు జమ చేసుకోవాలని రాష్ట్ర ప్రభుత్వం భావిస్తోంది. ఇప్పటికే రాష్ట్రంలో మద్యం విక్రయాలు, లైసెన్సుల జారీ, దరఖాస్తుల విక్రయం, ప్రత్యేక ఎక్సైజ్ పన్ను, ప్రివిలేజ్​ టాక్స్ తద్వారా గత ఏడాది ఇరవై ఒక్క వేల కోట్లు ఆదాయం వచ్చింది. ఈసారి మరో ఐదువేల కోట్లు మద్యం విక్రయ ద్వారా ఆర్జించాలని ఎక్సైజ్ శాఖ నిర్ణయించింది. అందుకోసం 15 నుంచి 25% వరకు మద్యం ధరలు పెంచాలని అబ్కారీ శాఖ యోచిస్తోంది. దీనిపై ఉన్నతాధికారులు లోతైన అధ్యాయనం చేస్తున్నారు.
ధరల పెంపు - అబ్కారీ శాఖ విశ్లేషణ

1. ఏ బ్రాండ్​కు ఎంత గరిష్ఠ చిల్లర ధర ఉంది
2. గ్రామాలు, పట్టణాలలో ఏ బ్రాండ్ ఎక్కువగా అమ్మకాలు జరుగుతున్నాయి
3. ముఖ్యంగా పట్టణ ప్రాంతంలో డిమాండ్ ఉన్న బ్రాండ్ ఏది..?
4. గ్రామీణ ప్రాంతంలో డిమాండ్ ఉన్న బ్రాండ్ ఏది..?
5. రాష్ట్రంలో లిక్కర్ కంటే బీర్లను ఎక్కువగా విక్రయిస్తున్నారు. వాటిలో ఏ రకం బీరుకు ఎక్కువ గిరాకీ ఉందో పరిశీలించి ధరల పెంపును అమలు చేస్తారు.

బ్రాండ్ల డిమాండ్​ బట్టి ధరలు పెంపు..!

మద్యం ధరల పెంపు విషయంలో రెండు రకాల స్లాబులు అమలు చేయాలని ప్రభుత్వం యోచిస్తోంది. 15 శాతానికి మించి ధరలు పెంచకూడదని అధికారులు భావిస్తున్నారు. ఖరీదైన మద్యంపై 15 శాతానికి తక్కువ లేకుండా ఆయా బ్రాండ్ల డిమాండ్​ను బట్టి 25% వరకు ధరలు పెంచాలని ప్రణాళిక సిద్ధం చేస్తున్నారు. అదేవిధంగా బీరుపై 15 నుంచి 20 రూపాయలు వరకు పెరిగే పెంచే అంశాన్ని పరిశీలిస్తున్నారు.

మున్సిపల్ ఎన్నికల తర్వాతే తుది నిర్ణయం..!
మున్సిపల్ ఎన్నికల ముందు మద్యం ధరలు పెంచడం వల్ల వ్యతిరేకత అధికమై ఆ ప్రభావం ఎన్నికలపై పడుతుందని ప్రభుత్వం భావిస్తోంది. ధరలు పెంచాలని నిర్ణయానికి వచ్చినప్పటికీ ఎన్నికల తరువాతే నిర్ణయం తీసుకునే అవకాశముంది.