గాంధీ అండ్​ లింకన్​ పుస్తకావిష్కరణ

చంద్రశేఖర్ కట్టిపల్లి రచించిన 'గాంధీ అండ్​ లింకన్​' పుస్తకాన్ని గవర్నర్ తమిళి సై సౌందర రాజన్​ ఆవిష్కరించారు. గాంధీ, లింకన్​ మార్గంలో యువత నడవాలని సూచించారు.

పిల్లల్లో జాతీయ భావం పెంపొందించేలా తల్లిదండ్రులు కృషి చేయాలని గవర్నర్ తమిళిసై సౌందర రాజన్​ అన్నారు. చంద్రశేఖర్​ కట్టిపల్లి రచించిన 'గాంధీ అండ్​ లింకన్​' పుస్తకాన్ని హైదరాబాద్​ నాంపల్లి రెడ్​ హిల్స్​లోని ఫ్యాప్సి ఆడిటోరియంలో మాజీ చీఫ్​ ఎలక్షన్ కమిషనర్ వీఎస్​ సంపత్​తో కలిసి ఆవిష్కరించారు. మాహాత్మ గాంధీ, అబ్రహాం లింకన్​ సారూప్యత ఉన్న చరిత్రకారులన్నారు.

గాంధీ, లింకన్​ సిద్ధాంతాలు, ఆశయాలు ఒకే పుస్తకంలో పొందుపర్చడం గొప్ప విషయమని గవర్నర్ ప్రశంసించారు. ఈ రోజుల్లో మంచి విషయాల కంటే కాంట్రవర్సీ విషయాలు వైరల్ అవుతున్నాయన్నారు. అలాంటి వాటికి తావివ్వకుండా పుస్తకాన్ని రచించారని రచయితను అభినందించారు. ట్రంప్​ పర్యటన సమయంలోనే ఈ పుస్తకాన్ని ఆవిష్కరించడం సంతోషకరంగా ఉందన్నారు.

ఇదీ చూడండి:విద్యుత్ వినియోగం పెరుగుతోంది.. అందుకే!