ఏపీలో కొత్తగా 12,634 కరోనా కేసులు, 69 మరణాలు

ఏపీలో గడిచిన 24 గంటల వ్యవధిలో 62,885 పరీక్షలు నిర్వహించగా.. 12,634 కేసులు నిర్ధరణ అయ్యాయి. 69 మంది మృతి చెందారు.

ఆంధ్రప్రదేశ్​లో కరోనా ఉద్ధృతి కొనసాగుతోంది. రోజురోజుకూ వైరస్​ బారిన పడుతున్న బాధితుల సంఖ్యతో పాటు మృతుల సంఖ్య సైతం పెరుగుతోంది. గడిచిన 24 గంటల వ్యవధిలో 62,885 పరీక్షలు నిర్వహించగా.. 12,634 కేసులు నిర్ధరణ అయ్యాయి. 69 మంది ప్రాణాలు కోల్పోయారు. తాజా కేసులతో కలిపి ఇప్పటివరకు ఆంధ్రప్రదేశ్​లో 10,33,560 మంది వైరస్‌ బారినపడినట్లు ఆ రాష్ట్ర వైద్యారోగ్య శాఖ వెల్లడించింది. ఆంధ్రప్రదేశ్ వ్యాప్తంగా ఇప్పటివరకు 1,59,31,722 నమూనాలను ఆరోగ్య శాఖ పరీక్షించింది.

కొవిడ్‌తో కృష్ణా జిల్లాలో అత్యధికంగా 12 మంది ప్రాణాలు కోల్పోయారు. నెల్లూరులో ఏడుగురు; తూర్పు గోదావరి, శ్రీకాకుళం, విశాఖ, పశ్చిమ గోదావరిలో ఆరుగురు చొప్పున; అనంతపురం, కడప ఐదుగురు చొప్పున; చిత్తూరు, గుంటూరులో నలుగురేసి; ప్రకాశం, విజయనగరంలో ముగ్గురు చొప్పున; కర్నూలులో ఇద్దరు మరణించారు. ఇప్పటి వరకు 7,685 మంది మృతి చెందారు.

24 గంటల వ్యవధిలో 4,304 మంది బాధితులు డిశ్చార్జ్​ అయ్యారు. మొత్తం కోలుకున్న వారి సంఖ్య 9,36,143కు చేరినట్లు వైద్యారోగ్య శాఖ తెలిపింది. ప్రస్తుతం ఆంధ్రప్రదేశ్​లో 89,732 యాక్టివ్‌ కేసులున్నాయి. అత్యధికంగా శ్రీకాకుళంలో 1,680 కేసులు నమోదు కాగా.. అత్యల్పంగా పశ్చిమ గోదావరి జిల్లాలో 331 మంది వైరస్‌ బారినపడ్డారు.

ఇదీ చదవండి :కరోనా కాటుకు సర్పంచ్ మృతి