త్వరలోనే చిన్న పట్టణాలకు 'ఓలా' బైక్​ సేవలు

రానున్న 12 నెలల్లో మరో 150 పట్టణాలకు బైక్​ అద్దె సేవలు విస్తరించనున్నట్లు ఆన్​లైన్​ క్యాబ్​ సేవల సంస్థ 'ఓలా' ప్రకటించింది. ఈ విస్తరణతో 3 లక్షల మంది బైకర్లకు ఉపాధి కల్పించనున్నట్లు తెలిపింది.

ఆన్​లైన్​ క్యాబ్ సేవల సంస్థ 'ఓలా' భారీ విస్తరణ ప్రణాళిక ప్రకటించింది. వచ్చే 12 నెలల్లోగా మరో 150 పట్టణాలకు 'ఓలా' బైక్​ సేవలు విస్తరించనున్నట్లు వెల్లడించింది. 'ఓలా' ప్రస్తుతం బైక్​ సేవలందిస్తున్న పట్టణాలతో పోలిస్తే ఈ సంఖ్య మూడింతలు ఎక్కువ.

ఈ విస్తరణ ద్వారా 3 లక్షల మంది బైకర్లకు ఉపాధి లభిస్తుందని 'ఓలా' మార్కెటింగ్​, సేల్స్​ అధిపతి అరుణ్​ శ్రీనివాస్​ అన్నారు. రానున్న ఏళ్లలో ఈ సంఖ్యను 10 లక్షలకు పైగా పెంచడమే తమ లక్ష్యంగా పేర్కొన్నారాయన.

'ఓలా' బైక్ అద్దె సేవలను 2016లో ప్రారంభించింది. గురుగ్రామ్​, ఫరిదాబాద్​, జైపుర్​లో తొలుత సేవలందించింది. ఆ తర్వాత హైదరాబాద్​, చంఢీగఢ్​, కోల్​కతా, గయ, బికనేర్​ వంటి నగరాలకు విస్తరించింది.

ఇదీ చూడండి: '5 ట్రిలియన్​ డాలర్ల ఆర్థిక వ్యవస్థ అసాధ్యం'