అదరగొట్టిన జొమాటో.. ఐపీఓకు భారీ స్పందన

ఆన్​లైన్​ ఫుడ్​ డెలివరీ సంస్థ జొమాటో(Zomato IPO) ఇనీషియల్​ పబ్లీక్​ ఆఫర్​ (ఐపీఓ)కు భారీ స్పందన దక్కింది. ఈనెల 14న మొదలై 16తో ఐపీఓ ముగియగా.. 38 రెట్లు అధిక సబ్​స్క్రిప్షన్​లు సాధించింది. ఇష్యూలో భాగంగా ఆ సంస్థ 71.92 కోట్ల షేర్లు విక్రయించింది.

ఆన్​లైన్​ ఫుడ్​ డెలివరీ సంస్థ జొమాటో పబ్లిక్​ ఇష్యూ(Zomato IPO)కు మదుపర్లు బ్రహ్మరథం పట్టారు. పబ్లిక్​ ఇష్యూ చివరి రోజు(శుక్రవారం) ముగిసే సమయానికి 38 రెట్లు అధికంగా ఈ ఐపీఓ సబ్​స్క్రైబ్​ అయ్యింది. ఇష్యూలో భాగంగా 71.92 కోట్ల షేర్లు విక్రయానికి పెట్టగా.. 2,751.25 కోట్ల షేర్లకు బిడ్లు దాఖలయ్యాయి. 2020, మార్చి తర్వాత ఇదే అతిపెద్ద ఐపీఓ.

అర్హులైన సంస్థాగత మదుపర్లు(క్యూఐబీ) విభాగంలో 52 రెట్లు అధికంగా సబ్​స్క్రైబ్​ కాగా.. ఎన్​ఐఐ విభాగంలో 19.43 కోట్ల షేర్లకు గానూ 640 కోట్ల షేర్లకు మదుపర్లు బిడ్లు వేశారు. రిటైల్​ విభాగంలో 12.96 కోట్ల షేర్లకు గానూ 7.45 రెట్లు అధికంగా సబ్​స్క్రైబ్​ అయ్యింది.

మరోవైపు.. సంస్థ ఉద్యోగుల కోసం ప్రత్యేకించిన 65 లక్షల షేర్లలో కేవలం 62 శాతం మాత్రమే సబ్​స్క్రైబ్​ కావడం గమనార్హం.

యాంకర్​ ఇన్వెస్టర్ల నుంచీ భారీగా బిడ్లు..

ఐపీఓకు ముందు రోజు (జూన్​ 13) నాటికి యాంకర్​ ఇన్వెస్టర్ల నుంచి 35 రెట్లు ఎక్కువ బిడ్లు పొందింది జొమాటో. ఒక్కో షేరుకు రూ.72-76గా ధర నిర్ణయించారు. ప్రారంభ వాటా అమ్మ‌కం కంటే ముందు 186 యాంక‌ర్ పెట్టుబ‌డిదారుల నుంచి రూ.4,196 కోట్ల‌కు పైగా వ‌సూలు చేసిన‌ట్లు జొమాటో తెలిపింది.

తొలుత రూ.9,375 కోట్ల నిధులు సమీకరించనుంది జొమాటో. అందులో 186 యాంకర్​ ఇన్వెస్టర్ల నుంచి 4,196.51 కోట్లు పొందనుంది.

2020, మార్చిలో ఎస్​బీఐ కార్డ్స్​ అండ్​ పేమెంట్​ సర్వీసెస్​ రూ.10,341 కోట్ల నిధుల ఇష్యూ తర్వాత.. రెండో స్థానంలో నిలిచింది జొమాటో.

ఇదీ చూడండి:జొమాటో బంపర్ ఆఫర్- బగ్ గుర్తిస్తే రూ.3లక్షల రివార్డ్