సాహో సైబర్‌ సెక్యూరిటీ- పెరిగిన అంకురాల ఆదాయం

ఆన్​లైన్ నేరాలు ఏటికేడు పెరిగిపోతున్న వేళ.. సైబర్ సెక్యూరిటీ ఉత్పత్తులకు డిమాండ్ పెరుగుతోంది. ఈ గిరాకీని భారత్​లోని అంకుర సంస్థలు సొమ్ము చేసుకుంటున్నాయి. అంతర్జాతీయంగానూ సేవలందిస్తున్నాయి. 2020లో ఈ అంకురాల ఆదాయం రెట్టింపు అయినట్లు ఓ నివేదికలో వెల్లడైంది.

అగ్ర దేశమా.. చిన్న దేశామా అని కాదు అన్ని దేశాలకూ సైబర్‌ మోసగాళ్ల ముప్పు పొంచి ఉన్న రోజులివి. చిన్న కంపెనీలే కాదు.. అగ్రశ్రేణి కంపెనీల కంప్యూటర్‌ వ్యవస్థలూ హ్యాకర్ల బారిన పడుతున్నాయి. అందుకే సైబర్‌ మోసాల నియంత్రణకు అన్ని దేశాల ప్రభుత్వాలు, కంపెనీలు అత్యంత ప్రాధాన్యం ఇస్తున్నాయి. ఫలితంగా సైబర్‌ సెక్యూరిటీ ఉత్పత్తులకు గిరాకీ పెరుగుతోంది. ఈ అవకాశాన్ని సద్వినియోగం చేసుకునే పనిలో దేశీయ అంకురాలున్నాయి. సైబర్‌ సెక్యూరిటీ అంకురాల సంఖ్య పెరగడమే కాదు.. వీటికి ప్రధాన కేంద్రంగా భారత్‌ అవతరించిందని, 2018తో పోలిస్తే వీటి ఆదాయాలు రెట్టింపు అయ్యాయని ఓ నివేదిక వెల్లడిస్తోంది. ఇక్కడి సైబర్‌ సెక్యూరిటీ సంస్థలు దేశీయంగానే కాకుండా అంతర్జాతీయ కంపెనీలకూ తమ సేవలను అందిస్తున్నాయని పేర్కొంది. డేటా సెక్యూరిటీ కౌన్సిల్‌ ఆఫ్‌ ఇండియా(డీఎస్‌సీఐ) రూపొందించిన ఈ నివేదికలోని వివరాలేమిటో చూద్దామా..

ఎక్కడ నుంచి ఎంతెంత

భారత్‌ సైబర్‌ సెక్యూరిటీ అంకురాలు ఆర్జిస్తున్న మొత్తం ఆదాయాల్లో 63 శాతం వరకు భారత్‌ నుంచే వస్తుండగా.. ఉత్తర అమెరికా నుంచి 16 శాతం ఉంటోంది.

బ్యాంకింగ్‌, ఆర్థిక సేవలు, ఐటీ రంగాల నుంచి అధిక ఆదాయం వస్తోంది. ఆరోగ్య సంరక్షణ, ఇ-కామర్స్‌, తయారీ రంగాల నుంచీ ఆదాయం గణనీయంగానే ఉంటోంది.

పెరిగిన ఆదాయం

విదేశాలకు 24% సంస్థలు

అంతర్జాతీయ విపణుల్లో అవకాశాలు పుష్కలంగా ఉన్నాయనే విషయాన్ని గమనించడంతో, గత రెండేళ్లలో 24 శాతం సంస్థలు విదేశాలకు తమ కార్యకలాపాలను విస్తరించాయి. అమెరికా, ఆస్ట్రేలియా, సింగపూర్‌, నెదర్లాండ్స్‌ లాంటి దేశాల్లోకి అడుగుపెట్టాయి.

నిధులు ఎలా..

దేశీయ అంకుర సంస్థలకు వెంచర్‌ కేపిటలిస్ట్‌లే ప్రధాన ఆదాయ వనరు. 75 శాతం నిధులు ఈ ఫండ్‌లే అందిస్తున్నాయి. అయితే అంకురాలు తాము సమీకరిస్తున్న నిధుల్లో 78 శాతం దేశీయంగానే ఉండటం గమనార్హం. 22 శాతం అమెరికా మదుపర్ల నుంచి వస్తున్నాయి.

అనుభవజ్ఞులే వ్యవస్థాపకులు

భారత్‌ అంకురాల్లో చాలా వాటికి వ్యవస్థాపకులుగా అనుభవజ్ఞులే ఉండటం గమనార్హం. 77% మందికి 10 ఏళ్లకు పైగా సైబర్‌ సెక్యూరిటీ రంగంలో పనిచేసిన అనుభవం ఉంది.

కార్యకలాపాలు

61% కంపెనీలు పూర్తిగా సైబర్‌ సెక్యూరిటీ ఉత్పత్తుల కార్యకలాపాలు నిర్వహిస్తుండగా.. 28% కంపెనీలు ఉత్పత్తులు, సేవలను కలిపి అందిస్తున్నాయి. మిగిలిన 11 శాతం కంపెనీలు ఇతర సాంకేతిక ఉత్పత్తులనూ అందిస్తున్నాయి.

ఉద్యోగులు

83% అంకురాల్లో 100 లేదా అంతకంటే తక్కువ మంది ఉద్యోగులు ఉన్నారు.

బెంగళూరు, ముంబయి, పుణె, దిల్లీ- ఎన్‌సీఆర్‌, హైదరాబాద్‌, చెన్నైలు సైబర్‌ సెక్యూరిటీ ఉత్పత్తుల అంకురాలకు ప్రధాన కేంద్రాలుగా ఉన్నాయి. 25% కొత్త కార్యాలయాలు మహారాష్ట్రలో ఉండగా.. 19% కార్యాలయాలతో కర్ణాటక రెండో స్థానంలో ఉంది.