Road Accident In Rajasthan :పాదచారులు సహా రోడ్డుపై పార్కింగ్ చేసిన టెంపోపైకి దూసుకొచ్చింది ఓ బస్సు. ఈ ప్రమాదంలో మగ్గురు పాదచారులు సహా మరో ఇద్దరు టెంపోలోని ప్రయాణికులు మరణించారు. మరో ఆరుగురు గాయపడగా.. ఒకరిని జైపుర్ ఆస్పత్రికి తరలించారు. ఈ ఘటన రాజస్థాన్ దౌసాలో గాజీపుర్ సమీపంలోని జాతీయ రహదారిపై జరిగింది.
ఇదీ జరిగింది
కైలాదేవిని దర్శించుకున్న భక్తులు.. హిందౌన్ నుంచి మహవాకు టెంపోలో బయలుదేరారు. మార్గమధ్యలో గాజీపుర్ సమీపంలో జాతీయ రహదారిపై టెంపోను పక్కకు ఆపారు. అదే సమయంలో మహవా నుంచి హిందౌన్కు వేగంగా వెళ్తున్న ఓ ఆర్టీసీ బస్సు.. రోడ్డు పక్కన ఆగిఉన్న టెంపో సహా పాదచారులపైకి దూసుకెళ్లింది. ఈ ప్రమాదంలో ముగ్గురు పాదచారులు, ఇద్దరు టెంపోలోని యాత్రికులు మృతిచెందారు. మరో ఆరుగురు గాయపడ్డారు. సమాచారం అందుకున్న పోలీసులు.. హుటాహటిన ఘటనా స్థలానికి చేరుకుని సహాయక చర్యలు చేపట్టారు. క్షతగాత్రులను సమీప ఆస్పత్రులకు తరలించారు.
ప్రమాదంపై వసుంధర రాజే సంతాపం
ఈ ప్రమాదంపై రాజస్థాన్ మాజీ ముఖ్యమంత్రి వసుంధర రాజే తీవ్ర సంతాపం వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు. క్షతగాత్రులు త్వరగా కోలుకోవాలని ఆకాంక్షించారు.