గుజరాత్లోని మోర్వా హాడాఫ్ నియోజకవర్గ ఉపఎన్నికల ప్రచారంలో కాంగ్రెస్ ఎమ్మెల్యే చంద్రికా బరియా స్థానికులను రెచ్చగొట్టే వ్యాఖ్యలు చేశారు. ఇటీవల పంచాయతీ ఎన్నికల్లో గెలిచిన భాజపా అభ్యర్థుల ఇళ్లపై రాళ్లు రువ్వాలని పార్టీ కార్యకర్తలకు పిలుపునిచ్చారు.
గెలిచిన అభ్యర్థులు ఈవీఎంలను ఉపయోగించి బోగస్ ఓట్లతో గెలిచినట్లు ఆరోపించారు చంద్రిక. ఓటర్లను మభ్య పెట్టేందుకు ఎన్నికల్లో మద్యాన్ని విచ్చలవిడిగా పంచారని తెలిపారు. అడ్డదార్లు తొక్కి గెలిచిన వారి ఇళ్లపై రాళ్లు రువ్వి సరైన సమాధానం చెప్పాలన్నారు. ఈ వ్యాఖ్యలు స్థానికంగా ఇరుపార్టీల మధ్య వివాదానికి దారి తీశాయి.
వచ్చే శాసనసభ ఎన్నికల్లో గుజరాత్ ముఖ్యమంత్రి విజయ్ రూపానీ తనపై పోటీ చేసి గెలవాలని సవాల్ విసిరారు చంద్రిక. తనను ఓడించాలంటే ముఖ్యమంత్రే స్వయంగా రంగంలోకి దిగాల్సి ఉంటుందని తెలిపారు.