Cyrus Mistry Car Accident: టాటా సన్స్‌ మాజీ ఛైర్మన్‌ సైరస్ మిస్త్రీని బలిగొన్న రోడ్డు ప్రమాదానికి మితిమీరిన వేగం, వాహన చోదకురాలి నిర్ణయ లోపమే కారణమని ప్రాథమికంగా వెల్లడైనట్లు పోలీసులు సోమవారం తెలిపారు. దుర్ఘటన జరిగే సమయంలో వెనుక సీట్లో ఉన్న మిస్త్రీ, జహంగీర్‌ సీటు బెల్టు పెట్టుకోలేదని పేర్కొన్నారు. సైరస్, ప్రముఖ గైనకాలజిస్టు అనాహితా పండోల్‌, ఆమె భర్త డేరియస్‌ పండోల్‌, ఆయన సోదరుడు జహంగీర్‌ పండోల్‌లు ఆదివారం కారులో అహ్మదాబాద్‌ నుంచి ముంబయి వస్తున్న సమయంలో ప్రమాదానికి గురైన సంగతి తెలిసిందే. అప్పుడు కారును అనాహితా నడుపుతున్నారు. మధ్యాహ్నం 2.21 గంటలకు ఈ వాహనం చరోటి చెక్‌పోస్ట్‌ను దాటిందని సీసీటీవీ కెమెరాలను పరిశీలించిన పోలీసులు తెలిపారు. అక్కడి నుంచి 20 కిలోమీటర్ల దూరంలో ఉన్న వంతెన వద్దకు 9 నిమిషాల్లోనే దూసుకెళ్లిందని పేర్కొన్నారు.
ప్రమాదంలో తీవ్రంగా గాయపడిన అనాహితా (55), ఆమె భర్త డేరియస్‌ (60)లను సోమవారం ఉదయం ముంబయిలోని సర్‌ హెచ్‌.ఎన్‌.రిలయన్స్‌ ఫౌండేషన్‌ ఆసుపత్రికి తరలించారు. ఆమె తుంటి, దవడ ఎముకలు విరిగాయని డాక్టర్లు తెలిపారు. సైరస్, జహంగీర్‌ల మృతదేహాలకు సోమవారం తెల్లవారుజామున ముంబయిలోని జె.జె.ఆసుపత్రిలో పోస్ట్‌మార్టం నిర్వహించారు. సైరస్ తలకు గాయాలైనట్లు తెలుస్తోంది. ఆయన పార్థివ దేహానికి మంగళవారం ఉదయం 11 గంటలకు వర్లీలో అంత్యక్రియలు జరుగుతాయి.