బాలుడి ప్రాణం తీసిన 'ఫ్రీ ఫైర్'​ మొబైల్​ గేమ్

ఆన్​లైన్ తరగతులు తప్పనిసరి అయిన కొవిడ్ విపత్కర పరిస్థితుల్లో ఓ తండ్రి తన తనయుడికి కొత్త ఫోన్ కొనిచ్చాడు. కానీ ఆ కొడుకు తరగతులకు బదులు 'ఫ్రీ ఫైర్' గేమ్​కి బానిసయ్యాడు. అంతే అమ్మ-నాన్న ఇద్దరి బ్యాంకు ఖాతాల్లో డబ్బుని గేమ్​కి కట్టేశాడు. విషయం తెలిస్తే తననేమంటారో అని భావించి ఆత్మహత్య చేసుకున్నాడు.

కరోనా కారణంగా ప్రస్తుత విద్యావిధానం ఆన్​లైన్​ ద్వారానే కొనసాగుతోంది. అయితే మొబైల్​ గేమ్స్​ అనగానే సంబరపడిపోయే పిల్లలు.. ఈ ఆన్​లైన్​ తరగతుల పేరిట ఫోన్లను మరో విధంగా ఉపయోగిస్తూ ప్రాణం మీదకు తెచ్చుకుంటున్నారు. ఇలాంటి ఘటనే ఒడిశాలోని కియోంజర్​లో జరిగింది.

'ఫ్రీ ఫైర్'​ కోసం లక్ష ఖర్చు

జోడా పారిశ్రామిక నగరంలోని కమర్​జోడా మురికివాడకు చెందిన వినోద్​ అపాట్ అనే వ్యక్తి కొడుకు అమితాన్షు అపాట్(14).. సరస్వతి శిశు మందిర్​ స్కూల్​లో 8వ తరగతి చదువుతున్నాడు. ఆన్​లైన్ తరగతుల కోసం తన తండ్రి అతనికి రూ.13,000తో ఓ ఫోన్​ కొనిచ్చాడు.

తరగతులకు హాజరవుతూనే చరవాణిని మరో విధంగా ఉపయోగించిన అమితాన్షు 'ఫ్రీ ఫైర్'​ గేమ్​కు అలవాటయ్యాడు. ముందుగా తన తండ్రి అకౌంట్​ నుంచి.. గేమ్​లో ఉండే కొత్త ఫీచర్ల కోసం రూ. 35,000 కట్టాడు. తర్వాత తన తల్లి బ్యాంక్ ఖాతా నుంచి రూ. 61,000 దాకా గేమ్​ కోసం ఖర్చు చేశాడు.

మరణమే శరణం అనుకుని

ఈ విషయం తెలిశాక తండ్రి తనను ఏమంటాడో అని భావించిన అమితాన్షు ఆత్మహత్యకు పాల్పడ్డాడు. శుక్రవారం తన తల్లి చీరతో బాత్​రూంలో ఉరివేసుకుని ఆత్మహత్య చేసుకున్నాడు.