మహిళా భద్రత: టాక్సీ​లపై కేంద్రానికి సుప్రీం సూచనలు

అంతర్జాల ఆధారిత టాక్సీ సేవలను నియంత్రించేందుకు చట్టాన్ని తీసుకురావలని అత్యున్నత న్యాయస్థానం కేంద్రానికి సూచించింది. నాలుగువారాల అనంతరం ఈ అంశంపై మరోమారు విచారణ చేపట్టనుంది సుప్రీం.

మహిళా భద్రత కోసం ఓలా, ఉబర్​ వంటి యాప్​ ఆధారిత టాక్సీ సేవలను నియంత్రించేందుకు చట్టాన్ని రూపొందించాలని సుప్రీంకోర్టు కేంద్రానికి సూచించింది.​ మహిళల భద్రతకు సంబంధించిన అంశంపై విచారణలో భాగంగా మోదీ సర్కారుకు ఈ సలహా ఇచ్చింది అత్యున్నత న్యాయస్థానం.

అంతర్జాల​ ఆధారిత యాప్​ల్లో మహిళలకు భద్రత లేదని... అందుకోసం ఎలాంటి నియంత్రణలు పాటించకుండా టాక్సీ సంస్థలు కార్యకలాపాలు సాగిస్తున్నాయని సీనియర్​ న్యాయవాది ఇందిరా జైసింగ్​ పేర్కొన్నారు. ఇలాంటి టాక్సీల్లోనే అత్యాచార ఘటనలు ఎన్నో జరిగాయన్నారు.

మహిళా భద్రత విషయంలో సుప్రీంకోర్టుకు సలహాదారుగా వ్యవహరిస్తున్నారు జైసింగ్​. వాహనాల్లో ఆడవారి భద్రతను రవాణాశాఖ పర్యవేక్షించడం లేదని కోర్టుకు తెలిపారు జైసింగ్​.

టాక్సీల్లో జీపీఎస్​ వ్యవస్థను తప్పనిసరి చేసేందుకు దిశానిర్దేశం చేయొచ్చని సుప్రీం వెల్లడించింది. పోలీసులను అప్రమత్తం చేసేందుకు ఒక వ్యవస్థ రూపొందించే అంశాన్ని పరిశీలించనున్నట్టు ధర్మాసనం స్పష్టం చేసింది.

నాలుగు వారాల అనంతరం తిరిగి ఈ అంశంపై విచారిస్తామని సుప్రీం తెలిపింది.

ఇదీ చుడండి:- సిద్ధార్థ సేవలు కొనియాడిన పారిశ్రామిక దిగ్గజాలు