'ఎన్​ఆర్​సీ తుది జాబితా భాజపాకు ఓ గుణపాఠం'

ఎన్​ఆర్​సీ జాబితా విషయంలో భాజపాపై విమర్శల వర్షం కురిపించారు ఎంఐఎం అధినేత అసదుద్దీన్​ ఓవైసీ.  అసోంలో 40 లక్షల మంది విదేశీయులు ఉన్నారని కేంద్రమంత్రి అమిత్​ షా చెప్పగా.. ఇప్పుడు ఆ సంఖ్య 19 లక్షలుగా తేలిందన్నారు.

అసోం జాతీయ పౌర జాబితా(ఎన్​ఆర్​సీ) భాజపాకి గుణపాఠం నేర్పిందని ఎంఐఎం అధినేత అసదుద్దీన్ ఒవైసీ విమర్శించారు. జాబితా సరిగా ఉంటే అసోం భాజపా నేతలు కేంద్ర ప్రభుత్వానికి ఎందుకు ఫిర్యాదు చేస్తున్నారని ప్రశ్నించారు.

"అసోంలో 40 లక్షల మంది విదేశీయులు ఉన్నారని అమిత్​ షా గతంలో చెప్పారు. ఆయన ఈ మాట మీద నిలబడతారా? వాళ్లు చెప్పిన కల్పిత పురాణం బయటపడింది. అందుకే అసోంలోని భాజపానే కేంద్రానికి ఫిర్యాదు చేసింది. ఒకవేళ ఫారెన్​ ట్రైబ్యునల్ న్యాయంగా పనిచేస్తే ఈ సంఖ్య ఇంకా తగ్గుతుంది. అసోంలోని కొంతమందితో మాట్లాడాను. తల్లితండ్రుల పేర్లు జాబితాలో ఉండి వారి కుమారుల పేర్లు గల్లంతయ్యాయి."

- అసదుద్దీన్​ ఓవైసీ, ఎంఐఎం అధినేత

ఆర్థిక వృద్ధి విషయంలోనూ భాజపా ఇదే విధంగా బుకాయిస్తోందని మండిపడ్డారు ఓవైసీ. జీడీపీ 5 శాతం ఉంటే 5 కోట్ల ట్రిలియన్ల రూపాయల ఆర్థిక వ్యవస్థ ఎలా సాధ్యమని ప్రశ్నించారు. భాజపా విధానాలే ఈ పరిస్థితికి కారణమని ఆరోపించారు.

ఇదీ చూడండి: తుది ఎన్​ఆర్​సీపై విశ్వాసం లేదు: అసోం భాజపా