'ఎస్సీ, ఎస్టీ చట్టం' తీర్పుపై త్రిసభ్య ధర్మాసనం సమీక్ష!

ఎస్సీ, ఎస్టీ చట్టంపై ఇచ్చిన తీర్పుపై సమీక్షకు సుప్రీం సమ్మతించింది. కేంద్రం దాఖలు చేసిన ఈ అభ్యర్థనను.. త్రిసభ్య ధర్మాసనం వచ్చే వారం విచారించనుంది. ఈ చట్టం కింద అరెస్ట్​పై కఠిన నిబంధనలను 2018లో సడలించింది సుప్రీం.

ఎస్సీ, ఎస్టీ చట్టంపై ఇచ్చిన తీర్పును సమీక్షించాలన్న కేంద్రం అభ్యర్థనపై సుప్రీంకోర్టు సానుకూలంగా స్పందించింది. ఈ వ్యాజ్యంపై వచ్చే వారం విచారణ జరపాలని త్రిసభ్య ధర్మాసనానికి సిఫార్సు చేసింది.

ఎస్సీ, ఎస్టీ వేధింపుల నిరోధక చట్టం కింద అరెస్టుపై ఉన్న కఠిన నిబంధనలను సడలిస్తూ 2018 మార్చి 20న అత్యున్నత న్యాయస్థానం తీర్పునిచ్చింది. ఈ తీర్పు సమస్యాత్మకంగా ఉందని.. కోర్టు సమీక్షించాలని అభ్యర్థించింది కేంద్రం. దీనిపై విచారించిన సుప్రీం.. తీర్పును ఈ ఏడాది మే 1న రిజర్వులో ఉంచింది.

కఠిన నిబంధనలను సడలిస్తూ సుప్రీం ఇచ్చిన తీర్పుపై దేశవ్యాప్తంగా నిరసనలు వెల్లువెత్తాయి. కొందరు సుప్రీం తీర్పును సమర్థించారు. తీర్పును నీరుగార్చడానికి ఎస్సీ, ఎస్టీ సవరణ బిల్లు-2018ని పార్లమెంట్​ ఆమోదించడం వల్ల.. కేంద్రం అభ్యర్థన అర్థరహితమని పేర్కొన్నారు. రివ్యూ పిటిషన్​పై సుప్రీం తీర్పునిచ్చే వరకు చట్ట సవరణపై స్టే విధించాలని కోరారు. అయితే స్టే విధించడానికి కోర్టు నిరాకరించింది.

ఇదీ చూడండి:-సైకిల్​పై యావత్​ దేశాన్ని చుట్టేస్తున్న తెలుగమ్మాయి!