ఒక్కరోజులోనే భారత్​లో 1211 కరోనా కేసులు

కరోనాపై పోరులో భాగంగా దేశవ్యాప్తంగా 1,06,719 ఐసోలేషన్​ పడకలు అందుబాటులో ఉన్నట్టు కేంద్రం ప్రకటించింది. ఇప్పటివరకు 2,31,902 మందికి వైరస్​ పరీక్షలు నిర్వహించినట్టు పేర్కొంది. ఇందుకోసం 166 ప్రభుత్వ, 70 ప్రైవేటు ల్యాబ్​లు అందుబాటులో ఉన్నట్టు స్పష్టం చేసింది.

దేశవ్యాప్తంగా ఇప్పటి వరకు 2,31,902 కరోనా పరీక్షలు జరిగినట్టు కేంద్రం తెలిపింది. 24 గంటల వ్యవధిలోనే 1,211 కేసులు వెలుగుచూశాయి. 31మంది మృతిచెందారు. ఇప్పటివరకు మొత్తం 10,363మందికి వైరస్​ సోకగా.. మృతుల సంఖ్య 339కి చేరింది. ప్రధానమంత్రి నరేంద్ర మోదీ సూచించిన 7 సూత్రాలను కచ్చితంగా పాటించాలని కేంద్ర ఆరోగ్యశాఖ సంయుక్త కార్యదర్శి లవ్​ అగర్వాల్​ స్పష్టం చేశారు. భౌతిక దూరం వందశాతం పాటించేలా చర్యలు తీసుకుంటున్నట్టు వివరించారు.

కరోనా బాధితులకు చికిత్స అందించడం కోసం ప్రత్యేకంగా 602 ఆసుపత్రులను కేటాయించినట్టు అగర్వాల్​ వెల్లడించారు. వీటిల్లో 1,06,719 ఐసోలేషన్​ పడకలు, 12వేల 024 ఐసీయూ బెడ్లు ఉన్నట్టు పేర్కొన్నారు. పరీక్షలు నిర్వహించడానికి 166 ప్రభుత్వ ల్యాబ్​లతో పాటు మరో 70 ప్రైవేటు ల్యాబ్​లు కూడా అందుబాటులో ఉన్నాయని పేర్కొన్నారు అగర్వాల్​. కరోనాకు సంబంధించి 20 గ్రీవెన్స్​ సెంటర్లు ఏర్పాటు చేసినట్టు వివరించారు.

28రోజులు...

ఏదైనా ఒక నిర్దేశిత ప్రాంతంలో 28 రోజుల పాటు ఒక్క కరోనా కేసు కూడా నమోదు కాకపోతే.. అప్పుడు ఆ ప్రాంతంలో వైరస్​ వ్యాప్తి చైన్​ను తెంచినట్లు అవుతుందని తెలిపారు లవ్​ అగర్వాల్​. వైరస్​పై అన్ని జిల్లాలు, నగరాలు చేపట్టిన చర్యలను కేంద్రం ఈ నెల 20వరకు పరిశీలిస్తుందని.. దాని బట్టి ప్రత్యేక కార్యకలాపాలు సాగించడానికి అనుమతినిస్తుందని స్పష్టం చేశారు.

పేదలకు...

పేదలందరికీ ఉచితంగా ఆహారం అందిస్తామని కేంద్రం ప్రకటించింది. 80కోట్ల మందికి 5 కిలోల చొప్పున ఆహార వస్తువులు అందించనున్నట్టు తెలిపింది. ఇందుకోసం 22లక్షల టన్నుల ఆహారధాన్యాలు అందుబాటులో ఉన్నట్టు స్పష్టం చేసింది.

సోమవారం వరకు 32కోట్ల మందికిపైగా పేదలు.. కేంద్రం అందించిన రూ.29,352 కోట్ల ఆర్థిక సహాయాన్ని పొందినట్టు తెలిపింది.