లోక్​సభ స్పీకర్​ ఎన్నిక, జమిలిపై కాంగ్రెస్​ భేటీ

యూపీఏ ఛైర్​పర్సన్​ సోనియా గాంధీ నివాసంలో నిర్వహించిన కాంగ్రెస్ పార్లమెంటరీ పార్టీ సమావేశంలో... లోక్​సభ స్పీకర్ ఎన్నిక, 'ఒకే దేశం- ఒకే ఎన్నిక' అంశాలపై నేతలు చర్చించారు. అయితే లోక్​సభా పక్షనేత ఎంపికపై ఎలాంటి ప్రకటన చేయలేదు.

దిల్లీలోని యూపీఏ ఛైర్​పర్సన్​ సోనియాగాంధీ నివాసంలో కాంగ్రెస్ పార్లమెంటరీ పార్టీ సమావేశం జరిగింది. లోక్​సభ స్పీకర్​ ఎన్నిక, ప్రధాని మోదీ పిలుపునిచ్చిన 'ఒకే దేశం, ఒకే ఎన్నిక' అంశాలపై నేతలు చర్చించారు. అయితే పార్టీ లోక్​సభా పక్షనేత ఎంపికపై ఎలాంటి ప్రకటన చేయలేదు.

ఈ సమావేశంలో కాంగ్రెస్ పార్లమెంటరీ పార్టీ నేత సోనియా గాంధీ, పార్టీ అధ్యక్షుడు రాహుల్​గాంధీ, మాజీ ప్రధాని మన్మోహన్ సింగ్​ పాల్గొన్నారు. ప్రధానితో జరిగే సమావేశంలో పార్టీ ఎలాంటి వ్యూహం అనుసరించాలో చర్చించారు.

విందు సమావేశానికి రండి

లోక్​సభ, రాజ్యసభలో సభ్యులున్న ప్రతిపార్టీ అధినేతను బుధవారం జరిగే సమావేశానికి ఆహ్వానించారు ప్రధాని మోదీ. 'ఒకే దేశం, ఒకే ఎన్నిక' అంశంపై చర్చిద్దామని పిలుపునిచ్చారు. అలాగే 2022లో నిర్వహించే 75వ స్వాతంత్ర్య దినోత్సవంపై, ఈ ఏడాది చేపట్టే మహాత్మా గాంధీ 150వ జయంతి ఉత్సవాల గురించి చర్చిద్దామని తెలిపారు.

అయితే ఈ అంశంపై ఇంకా నిర్ణయం తీసుకోలేదని కాంగ్రెస్ నేతలు చెబుతున్నారు.

ఆ విషయం చర్చించలేదు

కాంగ్రెస్ పార్లమెంటరీ పార్టీ సమావేశంలో లోక్​సభా పక్షనేత ఎంపికపై చర్చించలేదని బంగాల్​ కాంగ్రెస్ నేత అధిర్​ రంజన్​ చౌదరి స్పష్టం చేశారు. త్వరలోనే ఈ విషయంపై సోనియా గాంధీ నిర్ణయం తీసుకుంటారని ఆయన తెలిపారు.

ప్రస్తుతం లోక్​సభా పక్షనేత రేసులో రంజన్ చౌదరితో పాటు కేరళ కార్యనిర్వాహక అధ్యక్షుడు​ కె.సురేశ్​, పార్టీ అధికార ప్రతినిధి మనీశ్​ తివారీ, తిరువనంతపురం ఎంపీ శశిథరూర్ ఉన్నారని సమాచారం.

ఇదీ చూడండి: లోక్​సభ స్పీకర్​ ఎన్డీఏ అభ్యర్థిగా ఓం బిర్లా.!