వందే భారత్​​: సింగపూర్​ నుంచి దిల్లీకి 234 మంది

విదేశాల్లో చిక్కుకున్న భారతీయుల్ని స్వదేశానికి తరలించే ప్రక్రియ ముమ్మరమైంది. 234 మంది సింగపూర్​ నుంచి ఇప్పటికే దిల్లీ చేరుకున్నారు. బంగ్లాదేశ్​ నుంచి ప్రత్యేక విమానం, మాల్దీవుల నుంచి నౌక ద్వారా మరికొందరు భారత్​కు తిరిగి వస్తున్నారు.

కరోనా సంక్షోభంతో కొంతకాలంగా సింగపూర్​లో చేరుకున్న 234 మంది భారతీయులు ఎట్టకేలకు స్వదేశానికి చేరుకున్నారు. వందే భారత్​ మిషన్​లో భాగంగా కేంద్రప్రభుత్వం ఏర్పాటు చేసిన ప్రత్యేక విమానం... వీరందరితో ఈ మధ్యాహ్నం దిల్లీ విమానాశ్రయానికి చేరుకుంది.

బంగ్లాదేశ్​ నుంచి మరొకటి...

బంగ్లాదేశ్​ నుంచి మొదటి విడతలో భాగంగా 168 మందిని ప్రత్యేక విమానం ద్వారా తీసుకువస్తున్నట్లు అధికారులు తెలిపారు. ఈ ప్రత్యేక విమానం ఈ రోజు (శుక్రవారం) ఉదయం బయలు దేరినట్లు వెల్లడించారు. ఈ విమానం నేరుగా శ్రీనగర్​లో ల్యాండ్​ అవుతుందని తెలిపారు.

భారత ప్రభుత్వం బంగ్లాదేశ్ రాజధాని​ ఢాకా నుంచి మొత్తం ఏడు విమానాలను నడుపుతున్నట్లు ఆ దేశంలోని భారత హైకమిషన్​ పేర్కొంది.

మాల్దీవుల నుంచి...

ఆపరేషన్​ సముద్రసేతు కింద సముద్ర మార్గం ద్వారా మరికొంత మందిని తీసుకొస్తోంది ప్రభుత్వం. దీనిలో భాగంగా ఇప్పటికే మాల్దీవులకు చేరుకున్న ఐఎన్ఎస్​ జలాశ్వ మరికొన్ని గంటల్లో భారత్​కు బయలు దేరనుంది.