పెళ్లిపీటలు ఎక్కనున్న ఆర్య-సాయేషా

వెండితెర జంటలు నిజజీవితంలోనూ ఒక్కటవ్వుతున్నారు. తాజాగా తమిళ నటుడు ఆర్య ఈ జాబితాలో చేరాడు. ఆర్య త్వరలో ఓ ఇంటివాడు కాబోతున్నాడు.

పలు భాషల్లో సినిమాలు చేస్తూ అలరిస్తోన్న తమిళ నటుడు ఆర్య పెళ్లిపీటలు ఎక్కనున్నాడు. అఖిల్ సినిమాతో టాలీవుడ్​కి పరిచయమైన సాయేషాతో ప్రేమ విషయంపై క్లారిటీ ఇచ్చాడు ఈ పొడుగు హీరో. 'భలే భలే మగాడివోయ్​' చిత్రానికి తమిళ రిమేక్​ 'గజనీకాంత్'లో ఇద్దరు కలిసి నటించారు. అప్పటినుంచి వీరు ప్రేమలో ఉన్నట్టు పుకార్లు వచ్చాయి. మార్చిలో పెద్దల సమక్షంలో పరిణయానికి సిద్ధం అవుతున్నట్లు ట్విట్టర్లో వెల్లడించాడు.

ఆర్య, సాయేషా కలిసి దర్శకుడు కేవీ ఆనంద్ తెరకెక్కిస్తున్న‌ ‘కాప్పాన్‌’ సినిమాలో నటిస్తున్నారు. ప్రముఖ నటుడు దిలీప్‌ కుమార్‌, సైరా భానుల మనవరాలే సాయేషా.

ముంబయిలో పుట్టి పెరిగిన ఆమె ‘అఖిల్‌’తో తెలుగు తెరకు పరిచయమయ్యారు. తర్వాత హిందీలో అజయ్‌ దేవగణ్‌ సరసన ‘శివాయ్‌’లో నటించింది సాయేషా. ‘వనమగన్’, ‘కడైకుట్టి సింగం’, ‘జుంగా’, ‘గజనీకాంత్‌’ సినిమాలతో కోలీవుడ్‌లో గుర్తింపు తెచ్చుకుంది. ఆర్య కంటే సాయేషా వయసులో 17 ఏళ్లు చిన్నది.