నర్సీపట్నంలో లాక్​డౌన్..అప్రమత్తంగా ఉండాలి అధికారుల సూచన

కరోనా కేసులు రోజురోజుకీ విజృంభిస్తున్న సమయంలో అధికారులు ప్రత్యేక చర్యలు చేపట్టారు. విశాఖలోని పలు ప్రాంతాల్లో లాక్​డౌన్ విధించారు. ప్రజలు అత్యవసరమైతే తప్ప రోడ్ల మీదకు రావద్దని సూచించారు.

విశాఖ జిల్లా నర్సీపట్నం తదితర ప్రాంతాల్లో రోజురోజుకీ కరోనా కేసులు పెరుగుతున్నాయి. ఈ క్రమంలో ఈరోజు నుంచి నర్సీపట్నం పురపాలక పరిధిలో పాక్షికంగా లాక్​డౌన్ విధిస్తున్నట్లు అధికారులు ప్రకటించారు. ఈ మేరకు పట్టణంలోని వ్యాపారులతో ఆర్డీవో లక్ష్మీ శివజ్యోతి ,మున్సిపల్ కమిషనర్ కృష్ణవేణి, పట్టణ సీఐ స్వామి నాయుడు సమావేశాన్ని నిర్వహించారు.

ఈనెల 17 నుంచి ఆగస్టు నెల వరకు లాక్​డౌన్ నిబంధనలు ఉన్నట్లు వ్యాపారులకు తెలిపారు. ఇందుకు సహకరించాలని వ్యాపార వర్గాలను కోరారు. ప్రధానంగా వ్యాపార సంస్థలకు సంబంధించి ఉదయం 6 గంటల నుంచి మధ్యాహ్నం 2 గంటల వరకు మాత్రమే వ్యాపారం చేసుకోవాలని సూచించారు. రెస్టారెంట్లకు ఒక గంట పొడిగిస్తూ మూడు గంటల వరకు సమయాన్ని కేటాయించారు. మధ్యాహ్నం రెండు గంటల తర్వాత ఆటోలు, ఇతర ప్రైవేటు వాహనాలు పట్టణంలో ప్రయాణించడాన్ని నిషేధించారు. సెలవురోజుల్లో పూర్తిస్థాయిలో లాక్​డౌన్ కొనసాగించే విధంగా అధికారులు చర్యలు చేపట్టారు. ఇందుకు పట్టణంలోని ప్రజలు వ్యాపార సంస్థలు పూర్తిస్థాయిలో సహకరించాలని అధికారులు విజ్ఞప్తి చేశారు.

ఇదీ చదవండి:ఏపీ ప్రభుత్వంపై హైకోర్టు ఆగ్రహం..