తొలగని ముప్పు.. తూర్పు గోదావరి ప్రజల్లో ఆందోళన

రాష్ట్రంలో విస్తారంగా కురుస్తున్న వర్షాలకు పలు జిల్లాలో నదులు ఉప్పొంగి...తీవ్ర నష్టాన్ని కలిగిస్తున్నాయి. తాజాగా తూర్పుగోదావరి జిల్లాలోని అనేక ప్రాంతాల్లో ఏకధాటిగా కురుస్తున్న వర్షాలకు పంట పొలాలతో పాటు, ఇళ్లు మునిగి పోయాయి. ప్రజలు తీవ్ర ఇబ్బందులను ఎదుర్కొంటున్నారు. కొన్ని గ్రామాలకు రాకపోకలు నిలిపోగా, మరికొన్ని ప్రదేశాల్లో ఇళ్లు కూలి ప్రజలు ప్రమాదాల బారిన పడుతున్నారు. విపత్తు ప్రాంత ప్రజలందరిని పునరావాస కేంద్రాలకు తరలించినట్లు అధికారులు తెలిపారు.

తూర్పు గోదావరి జిల్లాలో గడిచిన 24 గంటల్లో 11.5 మిల్లీ మీటర్ల సగటు వర్షపాతం నమో దైంది. అత్యధికంగా పెదపాడు 70.6 మి.మీ., కుక్కునూరు 59.8 మి.మీ. కురిసింది. ఈ ఏడాది ఇప్పటికే మూడుసార్లు భారీ వర్షాలు, వరదలను తట్టుకున్న జిల్లా వాసులకు మరో మూడు రోజులు అలాంటి ముప్పే ఎదురుకానుంది. వాతావరణ శాఖ హెచ్చరికల నేపథ్యంలో ఇప్పటికే మళ్లీ వర్షాలు ఆరంభమైనందున అప్రమత్తంగా ఉండాలని అధికార యంత్రాంగం సూచిస్తోంది.

గోస్తనీ, యనమదుర్రు డ్రెయిన్లలో వరద ఉద్ధృతంగా ఉంది. పంట పొలాలు ఇంకా ముంపులోనే ఉన్నాయి. ఆక్వా చెరువులన్నీ ఏకం కావడంతో రైతులు కన్నీటి పర్యంతమవుతున్నారు. నివాసాలు ముంపునకు గురికావడంతో చాలా గ్రామాల ప్రజలు పునరావాస కేంద్రాల్లో తలదాచుకుంటున్నారు.

* యనమదుర్రు వరద ప్రభావం భీమవరం, గణపవరం, నిడదవోలు, మొగల్తూరు, ఉండి, పాలకోడేరు ప్రాంతాలపై ఎక్కువగా ఉంది. భీమవరంలో దుర్గాపురం, లంకపేట, చినపేట, మెంటేవారితోట, నాయుడుపాలెం, తోకతిప్ప, దెయ్యాలతిప్ప, కోమటితిప్ప నార్త్, లోసరి, ఎల్‌ఎన్‌వీపురం తదితర గ్రామాలు ముంపులో ఉన్నాయి. 15 గ్రామాల్లో ఆక్వా చెరువులు ఏకమయ్యాయి. ఉండి పరిధిలోని యండగండి, ఉప్పులూరు ముంపునకు గురికావడంతో 50 కుటుంబాలకు చెందిన 150 మందిని పునరావాస కేంద్రానికి తరలించారు.

* గణపవరం పరిధిలోని కేశవరం, పిప్పర అప్పన్నవీడు, ఎస్‌.కొండేపాడు పరిధిలోని పంట పొలాలు మునిగిపోయాయి. పాలకోడేరు మండలానికి చెందిన కోరుకొల్లు, మైప, గరగపర్రు గ్రామాలు జలమయమయ్యాయి. ఉండి, పాలకోడేరు, గణపవరం పరిధిలో సుమారు 2 వేల ఎకరాల వరకు పంట పొలాలు నీట మునిగాయి. సమీపంలోని యండగండి తదితర ప్రాంతాల్లో పంట పొలాలు, ఆక్వా చెరువులకు నష్టం వాటిల్లింది.

* ఆకివీడు పరిధిలోని చినకాపవరం డ్రెయిన్‌ నీటిని ఉప్పుటేరు తీసుకోకపోవడంతో కోళ్లపర్రు, దుంపగడప, సిద్ధాపురం గ్రామాల్లో ఆక్వా చెరువులు ఏకమయ్యాయి. తణుకు పరిధిలోని దువ్వ, మండపాక, నిడదవోలు పరిధిలోని ఉండ్రాజవరం ప్రాంతాల్లో వరద ప్రభావం ఉంది.

* గోస్తనీ వరద తీవ్రత స్థిరంగా ఉన్నా పెనుమంట్ర మండలంలో శనివారం భారీ వర్షం పడటంతో ప్రజలు భయభ్రాంతులకు గురవుతున్నారు. పెనుమంట్ర, సోమరాజు ఇల్లింద్రపర్రు, మాములూరు గ్రామాల్లోకి నీరు చేరింది. ఇదే స్థాయిలో ఆదివారం కూడా వర్షం కురిస్తే జుత్తిగ, మల్లెపూడి, నత్తారామేశ్వరం, గరువు తదితర గ్రామాలూ మునిగే అవకాశాలున్నాయి.

ఇటీవల కురిసిన అధిక వర్షాలు, వరదలకు జిల్లాలోని 48 మండలాల పరిధిలోని 437 గ్రామాల్లో 28,204 హెక్టార్ల విస్తీర్ణంలో పంట నీట మునిగింది.

భీమవరం..బిక్కుబిక్కు..!

భీమవరం పట్టణంలో యనమదుర్రు డ్రెయిన్‌ ఉద్ధృతికి పలు ప్రాంతాలు ముంపునకు గురవడంతో కొందరు ఇళ్లలోని విలువైన సామగ్రి సహా రోడ్డుపైకి వచ్చి గడుపుతున్నారు. భీమవరం-తాడేపల్లిగూడెం రహదారే వారికి ఆవాస ప్రాంతమైంది. వీధి దీపాలు పూర్తిగా వెలగకపోవడంతో వాహనాల హెడ్‌లైట్ల కాంతులే వెలుగునిస్తున్నాయి.

దెందులూరు

అలుగులగూడెం రహదారిలో సీతంపేట కాలువ కల్వర్టుపై నుంచి గుండేరు పాయ ద్వారా వరద దిగువకు పోతోంది. నాలుగైదు రోజులుగా ప్రవాహం కొనసాగుతుండటంతో రాకపోకలకు ప్రజలు ఇబ్బందులు పడుతున్నారు.

చేపలే.. చేపలు

కొల్లేరు ప్రాంతంలోని చేపల చెరువులకు గండ్లు పడటం, వరద చెరువుల్లో కలిసిపోవడంతో ఉప్పుటేరులోకి టన్నుల కొద్ది చేపలు వచ్చి పడుతున్నాయి. పడవలపై నుంచి, వంతెనపై నుంచి చేతివలలతో మత్స్యకారులు చేపల వేట కొనసాగించారు. ఆకివీడు పరిసర ప్రాంత ప్రజలు, వ్యాపారులు, అటుగా జాతీయ రహదారిపై వెళ్లే ప్రయాణికులు చేపలు కొనుగోలు చేసేందుకు పోటీపడ్డారు.

జీవన యానం.. ప్రాణ సంకటం!

జంగారెడ్డిగూడెం మండలం పట్టెన్నపాలెం శివారులో జల్లేరు వాగుపై ఉన్న తాత్కాలిక రహదారి పూర్తిగా కొట్టుకుపోయింది. ఐదు రోజులుగా జీలుగుమిల్లి, పోలవరం, బుట్టాయగూడెం తదితర మండలాల్లో గిరిజన, గిరిజనేతర గ్రామాలకు రాకపోకలు నిలిచిపోయాయి. ఆ ప్రాంతంలో పరిస్థితి ప్రమాదకరంగా ఉన్నా తప్పనిసరి అవసరాల రీత్యా పలువురు ప్రాణాలకు తెగించి కర్రల సాయంతో వాగు దాటుతున్నారు.
ఇల్లు కూలి వ్యక్తి మృతి

కుక్కునూరు

భారీ వర్షాలకు ఇల్లు కూలడంతో ఓ వ్యక్తి మృతి చెందారు. కుక్కునూరు మండలం వేలేరు గ్రామంలో శనివారం ఈ ఘటన జరిగింది. స్థానికుల కథనం ప్రకారం.. వెంకటేశ్వరరావుకు చెందిన తాటాకిల్లు గోడలు ఇటీవలి వర్షాలకు నానిపోయాయి. ఈ క్రమంలో శనివారం సాయంత్రం అకస్మాత్తుగా ఆ ఇల్లు కూలిపోయింది. ఆ సమయంలో ఇంట్లో మంచంపై పడుకొని ఉన్న వెంకటేశ్వరరావు శిథిలాల కింద చిక్కుకుపోయారు. స్థానికులు శిథిలాలను తొలగించి వెంకటేశ్వరరావును బయటకు తీయగా అప్పటికే ఆయన ప్రాణాలు కోల్పోయారు. దీనిపై స్థానికులు అధికారులకు సమాచారం ఇచ్చారు.

ఇదీ చదవండి: