శ్రీనివాసమంగాపురం బ్రహ్మోత్సవాలకు ఏర్పాట్లు పూర్తి చేసిన అధికారులు
చిత్తూరు జిల్లా చంద్రగిరి మండలం శ్రీనివాస మంగాపురం శ్రీ కళ్యాణ వెంకటేశ్వర స్వామి వారి వార్షిక బ్రహ్మోత్సవాలు రేపటి నుంచి ప్రారంభం కానున్నాయి. ఎనిమిది రోజుల పాటు జరిగే ఈ ఉత్సవాలకు అధికారులు అన్ని ఏర్పాట్లు పూర్తి చేశారు. ఆలయ ప్రాంగణాన్ని విద్యుత్ దీపాలతో సుందరంగా అలంకరించారు. భక్తుల సౌకర్యార్థం చలువ పందిళ్లు, ప్రత్యేక క్యూలైన్లు, అన్నవితరణ కేంద్రాలు సిద్ధం చేశారు. రేపు ఉదయం ముక్కోటి దేవతలను ఆహ్వానిస్తూ ధ్వజారోహణం నిర్వహించనున్నారు. ఈ బ్రహ్మోత్సవాల్లో ప్రతి రోజు స్వామి వారు వివిధ వాహన సేవల్లో దర్శనమివ్వనున్నారు.