గుంటూరు జిల్లాలో కేవలం ఒక్క అంకె ఓట్ల తేడాతోనే పలుచోట్ల సర్పంచ్‌ అభ్యర్థులను అదృష్టం వరించింది. అనుమర్లపూడిలో 1 ఓటుతో సుబ్బలక్ష్మి, పుట్లగూడెం సర్పంచ్‌గా 2 ఓట్లతో తోట పాపారావు, భీమినేనివారిపాలెంలో 3 ఓట్లతో ఆళ్ల శ్రీనివాసరావు గెలిచారు. గోరంట్ల సర్పంచిగా 3 ఓట్లతో మద్దిగుంట్ల వెంకయ్య విజయం సాధించారు. పుసులూరు సర్పంచిగా 9 ఓట్లతో పెద్ది రాధిక, అందుకూరులో 10 ఓట్లతో సౌభాగ్యలక్ష్మి సర్పంచయ్యారు. తోకవారిపాలెం సర్పంచ్‌గా 6 ఓట్లతో దొడ్డా సామ్రాజ్యం, దాసుపాలెంలో 11 ఓట్ల మెజార్టీతో ఆలపాటి వీరయ్య గెలిచారు. వైకుంఠపురంలో 17 ఓట్లతో విఠల్‌రావు విజయం సాధించారు.
ప్రకాశం జిల్లా అక్కపల్లెలో 7 ఓట్లతో సోమిరెడ్డి, చిన్నదోర్నాల సర్పంచిగా 9 ఓట్లతో పోలమ్మ గెలిచారు. నెల్లూరు జిల్లాలోని పైనంపురంలో కేవలం ఒకే ఓటుతో విజయకుమార్‌ సర్పంచ్‌గా ఎన్నికయ్యారు. రీకౌంటింగ్‌లో ఆధిక్యం 2 ఓట్లకు పెరిగింది. చిత్తూరు జిల్లా పాకాలలో 1 ఓటు తేడాతో కస్తూరి విజయం సాధించారు. మోదుగులపాళ్యంలో అభ్యర్థులకు సమాన ఓట్లు రాగా సందిగ్ధం ఏర్పడింది. ప్రతిపక్ష నేత చంద్రబాబు సొంతూరు నారావారిపల్లె గల గ్రామ పంచాయతీ కందులవారిపల్లెలో తెదేపా బలపరిచిన అభ్యర్థి గెలుపొందగా... ఆ పార్టీ కార్యకర్తలు సంబరాలు చేసుకున్నారు.
కృష్ణా జిల్లా బూతిమిల్లిపాడు సర్పంచిగా 4 ఓట్లతో సుబ్బారావు విజయం సాధించారు. తూర్పు గోదావరి జిల్లా గాడిలంక సర్పంచ్‌గా 10 ఓట్లతో పెద్దిరెడ్డి మునీంద్రరావు ఎన్నికయ్యారు. పశ్చిమ గోదావరి జిల్లా ఉంగుటూరు మండలం నీలాద్రిపురంలో 3 ఓట్లతో అభ్యర్థి గెలిచారు. విశాఖ జిల్లా వెన్నెలపాలెంలో గతంలో 3 సార్లు సర్పంచ్‌గా పనిచేసిన తెదేపా నేత బండారు సత్యనారాయణ మూర్తి సతీమణి మాధవీలత... ఓడిపోయారు. పెందుర్తి ఎమ్మెల్యే అదీప్‌రాజ్‌ సతీమణి రాంపురం పంచాయతీ సర్పంచ్‌గా విజయం సాధించారు. విజయనగరంలోని కొత్తవలస మేజర్‌ పంచాయతీలో కేవలం 10ఓట్ల తేడాతో ఫలితం తేలింది.