Chandrababu On YSRCP Govt: 'వైకాపా పాలనతో ప్రజలంతా నష్టపోతున్నారు'

Nara Chandrababu: వైకాపా పాలనతో ప్రజలంతా నష్టపోతున్నారని తెదేపా అధినేత చంద్రబాబు ఆగ్రహం వ్యక్తం చేశారు. ప్రజలు ఇప్పటికైనా పరిస్థితులను అర్థం చేసుకొని మెలగాలని సూచించారు. జగన్​ 30 నెలల పాలనలో రాష్ట్ర అభివృద్ధి 30 ఏళ్లు వెనక్కి వెళ్లిందని ఆగ్రహం వ్యక్తం చేశారు. అభివృద్ధి అంటే విధ్వంసం సృష్టించినంత సులువు కాదని.. ప్రభుత్వాన్ని ప్రశ్నిస్తే ఎదురుదాడి చేస్తున్నారని ఆక్షేపించారు.

Chandrababu fire on YSRCP: రాష్ట్ర విభజన కంటే.. సీఎం జగన్ రెడ్డి పాలన వల్ల రాష్ట్రం కోలుకోలేని విధంగా నష్టపోయిందని చంద్రబాబు ధ్వజమెత్తారు. జగన్​ 30 నెలల పాలనలో.. రాష్ట్రం అభివృద్ధిలో 30 ఏళ్లు వెనక్కి వెళ్లిందని ఆవేదన వ్యక్తం చేశారు. కరోనా వల్ల ప్రపంచం నష్టపోతే, జగన్ పాలన వల్ల ఏపీ నష్టపోయిందన్నారు. కరోనాకు వ్యాక్సిన్ ఉంది.. కానీ సీఎం జగన్ పాలనకు ఎలాంటి వ్యాక్సిన్ లేదని అన్నారు. రాష్ట్రానికి ప్రధాన ముద్దాయి.. 5 కోట్ల ప్రజల్ని దగా చేసి మోసం చేసిన ముఖ్యమంత్రి జగన్ రెడ్డేనని చంద్రబాబు దుయ్యబట్టారు. వంగవీటి రాధాపై రెక్కీ చేస్తే ఆధారాల్లేవన్నారన్న ఆయన.., తెలుగుదేశం పార్టీ కార్యాలయంపై దాడికి సంబంధించిన సీసీ ఫుటేజ్ ఇస్తే ఏం చర్యలు తీసుకున్నారని ప్రశ్నించారు. ప్రభుత్వం తప్పులు చేస్తున్నందువల్లే జీవోలను దాచి పెడుతున్నారని అన్నారు.

కేసుల నుంచి తప్పించుకునేందుకే సీఎం దిల్లీ టూర్..

వివేకా హత్య, సీబీఐ, ఈడీ కేసుల నుంచి తప్పించుకునేందుకే సీఎం దిల్లీ పర్యటన అని అన్నారు. కేంద్రం మెడలు వంచి తెస్తానన్న ప్రత్యేక హోదా, విశాఖ రైల్వే జోన్, స్టీల్ ప్లాంట్ వంటి హామీలు ఏమయ్యాయని నిలదీశారు. వివేకా హత్యకేసులో వెన్నంటే ఉన్నట్లు సోదరిని నమ్మించి అధికారంలోకి రాగానే ఎదురుదాడికి దిగారని ఆరోపించారు. వివేకా కూతురు మీదే కేసులు పెట్టే పరిస్థితికి వచ్చారన్నారు. ప్రత్యేక హోదా.. విభజన సమస్యలపై ఎంపీలంతా రాజీనామా చేద్దామంటే వైకాపా మాట్లాడడం లేదని మండిపడ్డారు. సీపీఎస్ రద్దు అంటే.. తెలియక హామీ ఇచ్చేశామంటున్నారని విమర్శించారు. రూ. 7 లక్షలకు పైగా అప్పు చేసి.. బావితరాలు సైతం ఇబ్బందులు ఎదుర్కొనే దుస్థితి తీసుకొచ్చారని మండిపడ్డారు. ప్రజలు అప్పుల ఊబిలో కూరుకుపోవాలనే విపరీత ధోరణి జగన్ రెడ్డిదన్నారు. కేంద్ర నిధులకు కొత్త పేర్లు పెట్టి.. ఏదో ఇచ్చేశామని జగన్ చెప్పుకుంటున్నారని చంద్రబాబు ఆక్షేపించారు.

ప్రభుత్వ ఆస్తుల ధ్వంసం సరికాదు..

వైకాపా పాలనతో ప్రజలంతా నష్టపోతున్నారని తెదేపా అధినేత చంద్రబాబు అన్నారు. రాష్ట్ర భవిష్యత్తు కోసం ప్రతీ ఒక్కరూ ఆలోచించాలని.. జరిగిన పరిణామాలను అవగతం చేసుకోవాలని సూచించారు. విధ్వంసంతోనే సీఎం జగన్ పాలనను ప్రారంభించారన్నారు. అలాగే ప్రజల కోసం కట్టిన ప్రజావేదికను కూల్చారని ఆరోపించారు. ప్రజల ఆస్తి విధ్వంసంతోనే ఉన్మాదం బయటపడిందని విమర్శించారు. ప్రభుత్వ ఆస్తిని ధ్వంసం చేస్తారా? అంటూ చంద్రబాబు ప్రశ్నించారు. విధ్వంసానికి కొనసాగింపుగా మూడు రాజధానులు తీసుకొస్తామన్నారని మండిపడ్డారు. భూములిచ్చిన పాపానికి రైతులంతా ఎన్నో అవమానాలు భరిస్తున్నారని ఆవేదన వ్యక్తం చేశారు. ఆనాడు సైబరాబాద్​ని గ్రాఫిక్స్ అని ఉంటే.. ఇవాళ అభివృద్ధి ఉండేదా అని నిలదీశారు. అడిగే ప్రశ్నలకు సమాధానం చెప్పలేక ఎదురుదాడి చేయిస్తున్నారని ఆక్షేపించారు.

ప్రభుత్వం పోలవరంపై శ్వేతపత్రం విడుదల చేయగలదా?

రాజధాని కోసం రైతులు స్వచ్ఛందంగా ముందుకొచ్చారని... వారిచ్చిన భూమితో చేపట్టిన నిర్మాణాన్ని నాశనం చేస్తున్నారని వాపోయారు. ఎన్నికలకు ముందు అమరావతే ఏకైక రాజధాని అని చెప్పి మాట తప్పారన్నారు. భూములిచ్చిన పాపానికి రైతులు అవమానాలు ఎదుర్కోవలసి వస్తోందని... కోట్ల ఆస్తిని విధ్వంసం చేస్తున్నప్పుడు ప్రజా చైతన్యం ఎంతో అవసరమని చంద్రబాబు పేర్కొన్నారు. అమరావతి, పోలవరం అభివృద్ధి చెందితేనే రాష్ట్రానికి భవిష్యత్తు ఉంటుందన్నారు. పోలవరం డీపీఆర్‌ను ఎందుకు ఖరారు చేయలేకపోయారని ప్రశ్నించారు. 2021 డిసెంబర్‌కు పోలవరం పూర్తి చేస్తామని చెప్పి.. ఇప్పటికీ చేయలేకపోయారన్నారు. పోలవరం పూర్తి చేయటం వైకాపా ప్రభుత్వానికి సాధ్యమా అని నిలదీసిన చంద్రబాబు.. దానిపై శ్వేతపత్రం విడుదల చేసే ధైర్యం ఉందా అని సవాల్ విసిరారు.

అభివృద్ధి.. విధ్వంసం చేసినంత సులువుకాదు..

దేశానికే అన్నం పెట్టే ఆన్నపూర్ణ లాంటి రాష్ట్రంలో వరి పండించొద్దనే దుస్థితిని సీఎం జగన్ రెడ్డి కల్పించారని తెలుగుదేశం అధినేత చంద్రబాబు ధ్వజమెత్తారు. అవినీతిని కేంద్రీకృతం చేసి అన్ని వ్యవస్థల్ని సర్వనాశనం చేస్తున్నారని మండిపడ్డారు. కియా లాంటి ప్రాజెక్టులు తీసుకురావటం విధ్వంసం చేసినంత సులభతరం కాదని ఎద్దేవా చేశారు. జాబ్ లెస్ క్యాలెండర్​ పేరుతో యువతకు ఉద్యోగాలు లేకుండా చేశారని ఆగ్రహం వ్యక్తం చేశారు. ప్రజాసమస్యలపై ఎవరు పోరాడినా దాడులకు దిగే పరిస్థితి నెలకొందని దుయ్యబట్టారు. ప్రజాధనం దుర్వినియోగం చేస్తూ విద్యా వ్యవస్థను భ్రష్టు పట్టించారని.. పాఠశాలల్లో టీచర్లు కావాలని పిల్లలు ఆందోళన చేసే పరిస్థితులు కల్పించారని ఆవేదన వ్యక్తం చేశారు.

సీఎం సొంత పవర్​ ప్రాజెక్టుల నుంచి ఉచిత కరెంటు ఇవ్వొచ్చుగా..?

జగన్​కు ధైర్యముంటే నిత్యావసరాల ధరలు తగ్గించాలని చంద్రబాబు సవాల్‌ చేశారు. వీటికితోడు.. కరెంట్ ఛార్జీల రూపంలో ఇప్పటి రూ. 36 వేల కోట్ల మేర పెంచారని మండిపడ్డారు. విద్యుత్ ఛార్జీలు పెంచిన జగన్ రెడ్డి తన సొంత పవర్ ప్రాజెక్టుల ద్వారా ఉచితంగా విద్యుత్ ఎందుకివ్వలేదని ప్రశ్నించారు. మద్యం దుకాణాల్లో ఆన్ లైన్ పేమెంట్లను ఎందుకు అమలు చేయరని చంద్రబాబు నిలదీశారు. మద్యం ప్రీమియం బ్రాండ్లను ఎందుకు ఆపారు, ఇప్పుడు ఎందుకు అనుమతించారంటూ ప్రశ్నించారు. మద్యం మాటున దోచుకున్నదంతా దోచుకుని.. ఇప్పుడు ప్రీమియం బ్రాండ్లను అనుమతిస్తారా అంటూ దుయ్యబట్టారు. లాక్​డౌన్​ సమయంలో.. ఉపాధ్యాయుల్ని మద్యం దుకాణాల వద్ద కాపలాపెట్టి మరీ అమ్మకాలు జరపడంపై ఆగ్రహం వ్యక్తం చేశారు.

నాగరికతకు చిహ్నమైన రహదారులూ కొరవడ్డాయి..

రాష్ట్రంలో రహదారుల దుస్థితిపై వీడియో ప్రదర్శించిన చంద్రబాబు.. సామాన్యుల ఆవేదనను ప్రస్తావించారు. రోడ్లపైనే ప్రసవాలు జరిగే పరిస్థితులు నెలకొన్నాయని విమర్శించారు. ప్రభుత్వం బిల్లులు చెల్లించనందునే కాంట్రాక్టర్లు పనులు చేసేందుకు ముందుకు రావడం లేదని అన్నారు. పూర్తిగా నిర్మించిన ఇళ్లను సైతం పేదలకు ఇచ్చేందుకు సీఎంకు మనసు రావడంలేదంటూ మండిపడ్డారు. తెలుగుదేశం హయాంలో అమలు చేసిన పథకాలనే నవరత్నాలుగా జగన్ కొనసాగిస్తున్నారని గుర్తు చేశారు. సంక్షేమ పథకాలన్నింటినీ రద్దు చేసి ఓటీఎస్ పేరుతో దోపిడీ పాల్పడుతున్నారని.. చెత్త, వీధి దీపాలపైనా పన్నులు వేయవచ్చని వినూత్నంగా ఆలోచించిన ఏకైక ప్రభుత్వం జగన్ రెడ్డి దేనని ఎద్దేవా చేశారు.

ఇదీ చూడండి: