రాష్ట్రంలో ఏం జరిగినా సీఎంకు, ప్రజాప్రతినిధులకు అంటగడుతున్నారని మంత్రి కొడాలి నాని అన్నారు. ముఖ్యమంత్రి జగన్తో సమావేశం ముగిసిన అనంతరం ఆయన మాట్లాడారు. పేకాట శిబిరాలు తాను నిర్వహిస్తున్నట్లు తెదేపా నేతలు ఆరోపిస్తున్నారని ఆగ్రహం వ్యక్తం చేశారు. సీఎం సహా నేను ఆదేశాలిస్తేనే పోలీసులు రైడ్ చేసి చాలా మందిని పట్టుకున్నారని స్పష్టం చేశారు. గతంలో గుడివాడ నియోజకవర్గంలో క్లబ్బులు మూయించింది తానేనని స్పష్టం చేశారు. ఆదివారం జరిగిన దాడుల్లో పేకాడేవారిలో కొందరు తప్పించుకున్నారని తెలిసిందని తెలిపారు. అందులో ఎంత పెద్ద వారున్నా వదలిపెట్టమన్నారు.
పేకాటలపై పోలీసులు దాడులు చేయడం, పట్టుకోవడం సాధారణమేని మంత్రి కొడాలి నాని చెప్పారు. పేకాడేవారిలో అన్ని పార్టీలవారు ఉండొచ్చని వ్యాఖ్యానించారు. పేకాట శిబిరంలో దొరికిన వారిలో నా అనుచరులు ఉంటే ఉండొచ్చని... ఒకవేళ నా అనుచరులు ఉంటే కోర్టులో ప్రవేశపెడతారన్న ఆయన... పేకాటకు ఉరిశిక్ష ఉందా? జైలు శిక్ష ఉందా? ఏం శిక్ష వేస్తారు? అని వ్యాఖ్యానించారు. వేస్తే అంతో ఇంతో జరిమానా విధిస్తారని చెప్పారు. ఇలాంటి వాటిని ఆరికట్టేందుకే కఠిన చట్టాలను తీసుకొచ్చేందుకు వైకాపా ప్రభుత్వం కృషి చేస్తుందని చెప్పారు. పేకాట శిబిరాలపై తనకు సమాచారమిస్తే 24 గంటల్లో దాడులు చేయిస్తాన్నారు.
ఆదివారం గుడివాడ నియోజకవర్గంలో జరిగిన దాడుల్లో ఉంటే నా అనుచరులు ఉండొచ్చు. ఒకవేళ ఉంటే కోర్టులో ప్రవేశపెడతారు. ఏమైనా వారికి ఉరి శిక్ష వేస్తారా..? జరిమానా వేస్తారు అంతే కదా. ఇలాంటి వాటిని ఆరికట్టేందుకే కఠిన నిర్ణయాలు తీసుకుంటున్నాం.ఎస్ఈబీ ఏర్పాటు సహా..ఆన్ లైన్ గేమింగ్స్ను నిషేధించేలా చట్టం తెచ్చాం. అంతదానికోసం సీఎంను కలవటానికి వస్తానా...? నా వ్యక్తిగత సమస్యల గురించి సీఎంను ఎప్పుడు కలవలేదు. కేవలం ప్రజా సమస్యలపైనే కలుస్తాను. గుడివాడ ప్రజలకు నేనోంటో తెలుసు. ఎవరో ఏదో మాట్లాడితే పట్టించుకోవాల్సిన అవసరం లేదు - కొడాలి నాని, రాష్ట్ర మంత్రి