ఆంక్షలు లేకుండా రుణమాఫీ పథకాన్ని అమలుచేయాలి - మాజీమంత్రి నిరంజన్​రెడ్డి - Former Minister Niranjan Reddy

Ex Minister Niranjan Reddy fires on Congress : రైతుల రుణమాఫీ అమలు కోసం పీఎం కిసాన్ సమ్మాన్ నిధి డేటాను ప్రాతిపదికగా తీసుకోవాలన్న రాష్ట్ర ప్రభుత్వ నిర్ణయం సరికాదని, మాజీ మంత్రి సింగిరెడ్డి నిరంజన్ రెడ్డి మండిపడ్డారు. రైతులకు సాయంపై రంధ్రన్వేణ చేస్తారా అని ప్రశ్నించిన ఆయన, రుణమాఫీ అందరికీ వర్తింప చేయాలని డిమాండ్ చేశారు. ప్రభుత్వ ఆంక్షలు గర్హనీయమని, కాంగ్రెస్ ప్రభుత్వ తీరు సిగ్గుచేటని ఆక్షేపించారు.

BRS Niranjan Reddy fires on Congress :రైతులు ఎవరైనా రైతులేనని, ఎన్నికల హామీ ప్రకారం రుణమాఫీ ప్రతి ఒక్కరికీ వర్తింపజేయాలని, మాజీమంత్రి సింగిరెడ్డి నిరంజన్​రెడ్డి పేర్కొన్నారు. ఏడు నెలలు దాటినా ఇంకా కట్ ఆఫ్​డేట్ కూడా నిర్ణయించకపోవడం ప్రభుత్వ అసమర్ధత, నిర్లక్ష్యానికి నిదర్శనమని ఆయన ఆరోపించారు. దేశంలో తొలిసారి కేసీఆర్ రైతుబంధు పథకం అమలు చేయడంతో, కేంద్ర ప్రభుత్వం మీద ఒత్తిడి పెరిగి ప్రధానమంత్రి కిసాన్ సమ్మాన్ యోజన పథకాన్ని తీసుకొచ్చారని తెలిపారు.

తెలంగాణలో 70 లక్షల మందికి పైగా రైతులు ఉండగా, కేంద్రం కిసాన్ సమ్మాన్ నిధిని గరిష్ఠంగా 36 లక్షల మంది రైతులకే అమలు చేశారని నిరంజన్​ రెడ్డి పేర్కొన్నారు. కేంద్రం విధించిన అనేక నిబంధనల మూలంగా, రాష్ట్రంలో కిసాన్ సమ్మాన్ నిధి రైతుల సంఖ్య 29,78,394 మంది కాగా ఇందులో 29,50, 888 మంది ఖాతాల్లో మాత్రమే ఈ విడతలో నగదు జమైందని ఆయన తెలిపారు.

ఎగ్గొట్టేందుకు రంగం సిద్దం.. ముఖ్యమంత్రిగా కేసీఆర్ ఉన్నప్పుడు 70 లక్షల మంది రైతులకు, ఎలాంటి ఆంక్షలు లేకుండా ఎకరాకు ఏడాదికి 10 వేలు రైతుబంధు పథకాన్ని వర్తింపజేశారని నిరంజన్​ రెడ్డి తెలిపారు. దేశ, ప్రపంచ చరిత్రలో ఎన్నడూ లేనివిధంగా 11 విడతల్లో రైతుబంధు పథకం కింద రైతుల ఖాతాల్లో 72,910 కోట్లు జమచేశారని గుర్తు చేశారు. పీఎం కిసాన్ సమ్మాన్ నిధి యోజనను ప్రాతిపదికగా తీసుకుని కాంగ్రెస్ ప్రభుత్వం రాష్ట్రంలో ఉన్న 70 లక్షల పైచిలుకు రైతాంగంలో సగానికి సగం మంది రైతులకు పథకాలను ఎగ్గొట్టేందుకు రంగం సిద్దం చేస్తోందని నిరంజన్ రెడ్డి మండిపడ్డారు.

అరకొరగానే అందజేత.. ఎన్నికల ప్రచార సమయంలోనే రైతుబంధు, రైతుభరోసా పథకాల అమలుకు నిబంధనలు వర్తింపజేస్తామని ఎందుకు చెప్పలేదని నిరంజన్​రెడ్డి ప్రశ్నించారు. ఎన్నికల సమయంలో రైతుబంధు తరహాలోనే ఎకరాకు ఏడాదికి 15 వేలు చొప్పున రైతుభరోసా ఇస్తామని రైతులను హామీ ఇచ్చారని, అధికారం చేతికి వచ్చాక రైతుబంధు తరహాలోనే గత యాసంగిలో ఎకరాకు ఐదువేలు అరకొరగా ఇచ్చి చేతులు దులిపేసుకున్నారని ఆయన ఆక్షేపించారు.

అధికారంలోకి వచ్చి ఏడునెలలు దాటినా ఇంకా విధి విధానాలు, మార్గదర్శకాలు అంటూ మరోసారి ఎకరాకు ఐదువేలు ఇస్తామనడం సరికాదని నిరంజన్​రెడ్డి తెలిపారు. పెంచిన రూ. 2500 వాయిదాల పద్ధతి మొదలు పెట్టారని మండిపడ్డారు. అబద్దపు హామీలు ఇచ్చి రాష్ట్ర ప్రజలను మోసం చేసినందుకు ప్రభుత్వం క్షమాపణ చెప్పాలని డిమాండ్ చేశారు. రేవంత్ రెడ్డి పనితీరు పేరు గొప్ప, ఊరు దిబ్బ అన్నట్లు మీడియా ప్రచారం, వార్తల లీకేజీలు, ప్యాకేజీలు అన్నట్లుగా పాలన సాగుతోందని వ్యాఖ్యానించారు. ఆడలేక మద్దెలోడు తరహాలో కాంగ్రెస్ ప్రభుత్వం అన్ని పథకాలలో కోతలు విధిస్తోందని నిరంజన్ రెడ్డి ఆరోపించారు.