One Crore Seized in Hyderabad in One Day: రాష్ట్రంలో లోక్సభ ఎన్నికల దృష్ట్యా ఓటర్లను మభ్యపెట్టేందుకు ఎలాంటి ఘటనలను జరగకుండా ఉండేందుకు పోలీసులు తనిఖీలు నిర్వహించారు. ఈ క్రమంలో సైబరాబాద్ కమిషనరేట్ పరిధిలో భారీగా నగదు పట్టుబడింది. సుమారు రూ.1.06 కోట్లు పోలీసులు స్వాధీనం చేసుకున్నారు. ఎన్నికల సంఘం నిర్ధేశించిన నియమాలు పాటించకుండా తరలిస్తున్నందున సీజ్ చేస్తున్నట్లు పోలీసులు వెల్లడించారు.
పోలీసులు తెలిపిన వివరాల ప్రకారం : హైదరాబాద్లో ఎన్నికల కోడ్ తనిఖీల్లో భాగంగా సైబరాబాద్ కమిషనరేట్లో ఎస్ఓటీ బృందం, వాహనాలపై నిఘా పెట్టింది. ఈ క్రమంలో బ్యాంకులకు నగదు తీసుకెళ్లే వాహనాల్లో డబ్బును తరలిస్తున్నట్లు గుర్తించారు. వాటిని తనిఖీ చేయగా రూ. 1,06,62,730లు స్వాధీనం చేసుకున్నారు. ఈ నగదు మొత్తం పలు పోలీస్ స్టేషన్ల పరిధిలో పట్టుకున్నారు. ఈ డబ్బును ఎన్నికల సంఘం నిర్ధేశించిన ఎలాంటి నియమాలు పాటించకుండా తరలిస్తున్నందుకు సీజ్ చేసినట్లు పోలీసులు వెల్లడించారు. దీంతో పాటు నగదు పట్టుకున్న ప్రాంతాల వివరాలు కూడా తెలిపారు.
| క్రమ సంఖ్య | నగదు పట్టుకున్న బృందం పేరు | స్థానిక పోలీస్ స్టేషన్ పేరు | పట్టుకున్న నగదు(రూపాయల్లో) |
| 1 | మేడ్చల్ ఎస్ఓటీ టీం | దుండిగల్ | 60,17,400 |
| 2 | రాజేంద్రనగర్ ఎస్ఓటీ టీం | అత్తాపూర్ | 22,30,600 |
| 3 | మేడ్చల్ ఎస్ఓటీ టీం | శామీర్‌పేట | 9,11,900 |
| 4 | మాదాపూర్‌ ఎస్ఓటీ టీం | చందానగర్‌ | 7,38,327 |
| 5 | మేడ్చల్ ఎస్ఓటీ టీం | రాజేంద్రనగర్ | 5,01,993 |
| 6 | బాలానగర్‌ ఎస్ఓటీ టీం | కూకట్‌పల్లి | 2,62,600 |
| మొత్తం | 1,06,62,730 |