Onion Tomato Chutney Recipe : మార్నింగ్ బ్రేక్ఫాస్ట్లో ఇడ్లీ, దోశ, వడ, పూరి అంటూ చాలా వెరైటీలు ప్రిపేర్ చేసుకుంటుంటాం. కానీ, అందులోకి చట్నీ మాత్రం మాగ్జిమమ్ పల్లీ చట్నీయే ఉంటుంది. రోజూ ఒకే చట్నీ బోర్ కొడుతుంది. అంతేకాదు, అప్పటికే గ్యాస్ ప్రాబ్లమ్ ఉన్నవారిని ఈ చట్నీ కాస్త ఇబ్బంది పెడుతుంది. అందుకే మీకోసం ఒక అద్భుతమైన రెసిపీ తీసుకొచ్చాం. అదే, కమ్మని "ఉల్లిపాయ టమాటా చట్నీ".
దీన్ని చాలా తక్కువ సమయంలో, తక్కువ పదార్థాలతో ప్రిపేర్ చేసుకోవచ్చు. ఇది అన్ని రకాల టిఫెన్స్తో పాటు రైస్లోకీ చాలా రుచికరంగా ఉంటుంది. వేడివేడి అన్నంలో దీన్ని కాస్త నెయ్యి వేసుకొని తింటుంటే ఆ టేస్ట్ నెక్ట్ లెవల్లో ఉంటుంది. మరి, ఈ సింపుల్ అండ్ టేస్టీ చట్నీతయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఇప్పుడు చూద్దాం.
కావాల్సిన పదార్థాలు :
- ఆయిల్ - 1 టేబుల్స్పూన్
- ఆనియన్స్ - 2 (పెద్ద సైజ్వి)
- టమాటా - 1 (పెద్ద సైజ్ది)
- వెల్లుల్లి రెబ్బలు - 10
- జీలకర్ర - 1 టీస్పూన్
- చింతపండు - చిన్న నిమ్మకాయ సైజంత
- ఉప్పు - రుచికి సరిపడా
- కారం - రుచికి తగినంత
- కొత్తిమీర తరుగు - కొద్దిగా
తాలింపు కోసం :
- నూనె - 1 టేబుల్స్పూన్
- పోపు దినుసులు - 1 టేబుల్స్పూన్
- ఎండుమిర్చి - 3
- కరివేపాకు - కొద్దిగా
అద్దిరిపోయే టిప్తో "అల్లం చట్నీ" - రోడ్ సైడ్ టిఫెన్ బండ్ల సీక్రెట్ ఇదే!
తయారీ విధానం :
- ముందుగా రెసిపీలోకి కావాల్సిన ఉల్లిపాయలనుసన్నగా పొడవాటి ముక్కలుగా కట్ చేసుకొని పక్కన పెట్టుకోవాలి. అలాగే, టమాటాను చిన్న చిన్న ముక్కలుగా తరుక్కొని పక్కనుంచాలి.
- ఇప్పుడు స్టౌపై పాన్ పెట్టుకొని నూనె వేసుకోవాలి. ఆయిల్ వేడయ్యాక జీలకర్ర, ముందుగా తరిగి పెట్టుకున్న ఉల్లిపాయ ముక్కలు, పొట్టు తీసిన వెల్లుల్లి రెబ్బలు వేసుకొని మీడియం ఫ్లేమ్ మీద ఒక నిమిషం పాటు ఫ్రై చేసుకోవాలి.
- అనంతరం ముందుగా కట్ చేసి పెట్టుకున్న టమాటాముక్కలు, చింతపండు, ఉప్పు, కారం వేసుకొని మొత్తం కలిసేలా ఒకసారి బాగా మిక్స్ చేసుకోవాలి.
- ఆ తర్వాత మూత పెట్టి మధ్యమధ్యలో కలుపుతూ మీడియం ఫ్లేమ్ మీద ఉల్లిపాయ, టమాటా ముక్కలను మెత్తగా ఉడకనివ్వాలి.
- ఆ విధంగా ఉడికంచుకున్నాక అందులో కొత్తిమీర తరుగు యాడ్ చేసుకొని కలుపుకోవాలి. ఆపై స్టౌ ఆఫ్ చేసుకొని మిశ్రమాన్ని కొద్దిగా చల్లారనివ్వాలి.
- ఇప్పుడు మిక్సీ జార్లో చల్లారిన ఉల్లిపాయ మిశ్రమం వేసుకొని కొంచం బరకగా గ్రైండ్ చేసుకోవాలి. తర్వాత దాన్ని ఒక బౌల్లోకి తీసుకొని పక్కన పెట్టుకోవాలి.
- అనంతరం పచ్చడిలోకి తాలింపు కోసం స్టౌపై చిన్న కడాయి పెట్టుకొని నూనె వేసుకోవాలి. ఆయిల్ కొద్దిగా వేడయ్యాక అందులో పోపు దినుసులు(జీలకర్ర, ఆవాలు, మినపప్పు, శనగపప్పు), ఎండుమిర్చి తుంపలు, కరివేపాకు వేసి ఫ్రై చేసుకోవాలి.
- తాలింపు చక్కగా వేగాక స్టౌ ఆఫ్ చేసుకొని ముందుగా ప్రిపేర్ చేసుకున్న పచ్చడిలో వేసి మొత్తం కలిసేలా ఒకసారి బాగా కలుపుకోవాలి.
- చివర్లో కొద్దిగా సన్నని ఉల్లిపాయ ముక్కలు వేసుకొని కలిపి సర్వ్ చేసుకుంటే చాలు. అంతే, ఎంతో టేస్టీగా ఉండే కమ్మని "ఉల్లి టమాటా చట్నీ" మీ ముందు ఉంటుంది!
- ఇది కనీసం రెండు, మూడు రోజుల పాటు ఫ్రెష్గా ఉంటుంది! నచ్చితే, మీరూ ఓసారి ఈ పచ్చడిని ట్రై చేయండి.
అసలైన "కొబ్బరి చట్నీ" చేసే పద్ధతి ఇదీ - వేళ్లు నాకేస్తారంతే!
