Video: அரசு பேருந்து சங்கரத்தில் சிக்கி அங்கன்வாடி ஊழியர் பலி.. பதைபதைக்க வைக்கும் சிசிடிவி காட்சி! - Chengalpattu news

செங்கல்பட்டு அடுத்த மேலேரிப்பாக்கத்தில் சந்திரசேகர் - குமாரி (57) தம்பதி வசித்து வந்தனர். இதில் குமாரி வாலாஜாபாத் அருகே உள்ள அங்கன்வாடி மையத்தில் சத்துணவு அமைப்பாளராகப் பணியாற்றி வந்தார். இந்த நிலையில், நேற்று (மே 2) மாலை வழக்கம் போல பணி முடிந்து தனது கணவருடன் இருசக்கர வாகனத்தில் குமாரி வீடு திரும்பிக் கொண்டிருந்தார். 

செங்கல்பட்டு ஜி.எஸ்.டி சாலையில் சென்ற போது போக்குவரத்து நெரிசல் ஏற்பட்டுள்ளது. இதனால் சந்திரசேகர் தனது இருசக்கர வாகனத்தை நிறுத்த முயற்சித்துள்ளார். ஆனால், எதிர்பாராத விதமாக இருசக்கர வாகனம் நிலைதடுமாறி கீழே சாய்ந்துள்ளது. அப்போது பின்னால் அமர்ந்திருந்த குமாரி கீழே விழுந்துள்ளார். 

அப்போது எதிர் திசையில் உத்திரமேரூரில் இருந்து செங்கல்பட்டு நோக்கி வந்த அரசுப் பேருந்து குமாரியின் மீது ஏறியது. இதில் குமாரி உடல் நசுங்கி சம்பவ இடத்திலேயே உயிரிழந்துள்ளார். பின்னர் இது குறித்து தகவல் அறிந்து சம்பவ இடத்துக்கு வந்த காவல் துறையினர், குமாரியின் உடலைக் கைப்பற்றி பிரேத பரிசோதனைக்காக செங்கல்பட்டு அரசு மருத்துவமனைக்கு அனுப்பி வைத்தனர். 

மேலும், இந்த விபத்து குறித்து வழக்குப் பதிவு செய்த காவல் துறையினர் விசாரணை நடத்தி வருகின்றனர். இதனிடையே இந்த விபத்து தொடர்பான சிசிடிவி காட்சிகள் வெளியாகி உள்ளது.