சென்னை - பெங்களூரு நெடுஞ்சாலையில் பற்றி எரிந்த டிப்பர் லாரி.. ராணிப்பேட்டையில் நடந்தது என்ன?
ராணிப்பேட்டை: சென்னை - பெங்களூரு தேசிய நெடுஞ்சாலையில் டிப்பர் லாரி ஒன்று சென்று கொண்டிருந்தது. அதே வழியாக வந்த இரு சக்கர வாகனம் ஒன்று காவேரிப்பாக்கம் அருகே எதிர்பாராத விதமாக டிப்பர் லாரி மீது மோதி விபத்துக்குள்ளானது. இந்த விபத்தால் திடீர் தீ விபத்து ஏற்பட்டு லாரியின் முன்பகுதி மற்றும் இருசக்கர வாகனத்தில் தீ பரவியது.
இந்த கோர விபத்தில் பைக்கில் வந்த அடையாளம் தெரியாத நபர் தீயில் கருகி சம்பவ இடத்திலேயே உயிரிழந்தார். சம்பவம் குறித்து அறிந்து நிகழ்விடத்திற்கு வந்த ராணிப்பேட்டை தீயணைப்பு வீரர்கள் போராடி தீயை அணைத்தனர்.
பின்னர், காவேரிப்பாக்கம் போலீசார் கருகிய உடலை கைப்பற்றி பிரேத பரிசோதனைக்காக ராணிப்பேட்டை அரசு மருத்துவமனைக்கு அனுப்பி வைத்ததோடு அந்த நபர் குறித்த தகவல்களை சேகரித்து வருகின்றனர். இதனிடையே இந்த விபத்தால் சென்னை - பெங்களூரு சாலையில் சிறிது நேரம் போக்குவரத்து பாதிக்கப்பட்டது.
இதையும் படிங்க: ஏலகிரி மலையில் சுற்றுலா வேன் கவிழ்ந்து விபத்து - சுற்றுலா பயணிகளுக்கு என்னாச்சு?