அரிய நோயால் பாதிக்கப்பட்டுள்ள மலையாள நடிகை; மருத்துவர்களின் அறிவுரை என்ன?

மலையாள நடிகை மம்தா மோகன்தாஸ் பாதிக்கப்பட்டுள்ள வெட்டிலிகோ எனும் தோல் நோய் குறித்து மருத்துவர்கள் தெரிவிக்கும் தகவல்களைக் காணலாம்.

ஹைதராபாத்: பொதுவாகவே மக்கள், தோளில் வெள்ளை புள்ளி போன்ற குறைபாடுகளை பொது வெளிகளில் ஒரு சில நபர்களிடம் கண்டால், அவர்களை விட்டு விலகி செல்வது வழக்கம். உலகில் பல மக்களும் இதுபோன்ற குறைபாடுகளால் பாதிக்கப்பட்டு அவதிக்குள்ளாகி வருகின்றனர். இதுபோன்று உடலில் வெள்ளைப் புள்ளிகள் உருவாகுவது விட்டிலிகோ (Vitiligo) என்று அழைக்கப்படுகிறது. இதுகுறித்த போதுமான விழிப்புணர்வு மக்களிடையே இல்லை எனக் கூறலாம்.

இந்நிலையில் பிரபல மலையாள நடிகையும், பாடகியுமான மம்தா மோகன்தாஸ் கடந்த சில நாட்களுக்கு முன்னர் ’தான் விட்டிலிகோ நோயால் பாதிக்கப்பட்டதாகவும், இதனால் அவரது தோலின் நிறம் மாறுகிறது எனவும்; ஆனாலும் இதனை எதிர்த்து போராட சூரியனுடைய உதவி வேண்டும்’ என தனது சமூக வலைதளப்பக்கத்தில் பதிவிட்டிருந்தார். இவரது இந்தப் பதிவிற்கு திரையுலக நட்சத்திரங்கள் மற்றும் ரசிகர்கள் பலரும், ’இதனை போராடி உங்களால் வென்று வர முடியும்’ எனத் தொடர்ந்து அவருக்கு ஆதரவாகப் பதிவிட்டு வருகின்றனர்.

இந்த விட்டிலிகோ நோய் குறித்து மருத்துவர்கள் கூறுகையில், "வெள்ளை புள்ளி என்பது தான் மருத்துவ கூற்றுப்படி விட்டிலிகோ என அழைக்கப்படுகிறது. இந்த நோயானது ஜெனிடிக், ஊட்டச்சத்து குறைபாடு போன்ற பல காரணங்களால் உடலிற்கு நிறத்தைத் தரும், மெலனின் செல்களின் குறைபாட்டால் ஏற்படுகிறது. இது வெள்ளை தொழுநோய் (White leprosy) என அழைக்கப்படுகிறது. இதன் காரணமாக இதனை பலரும் தொற்று நோய் என நினைத்துக் கொள்கின்றனர்.

ஆனால், உண்மையில் விட்டிலிகோ ஒரு தொற்று நோய் அல்ல, அது நாம் நோய் உள்ளவர்களிடம் பழகுவதாலோ, அவர்களை தொடுவதாலோ நமக்குப் பரவாது. இந்த நோயானது வெள்ளை புள்ளிகள் வரும் இடங்களை வைத்து பிரிக்கப்பட்டுள்ளது, அவை

• Common Vitiligo: இந்த பாதிப்பு, பொதுவாக உடலின் பல பாகங்களில் திடீரென தோன்றி பரவக் கூடும். அதே நேரம் தானாகவே மறையவும் கூடும்.
• Segmental Vitiligo: இந்த பாதிப்பு, உடலின் குறிப்பிட்ட சில பாகங்களில் வரக்கூடும். மேலும் அவை தொடர்ந்து தோளில் பரவி, ஒரு சில ஆண்டுகளில் தானாகவே பரவுவது நின்று விடும்.
• Focal and Universal Vitiligo: இதுமிகவும் அரிதான வகையாகும். Focal விட்டிலிகோ என்பது வெள்ளை புள்ளிகள் சிறியதாக உடலில் ஒரு சில இடங்களில் தோன்றக்கூடும். Universal விட்டிலிகோ என்பது உடலின் 80 சதவிகிதத்தைப் பாதிக்கும்.
• Acrofacial Vitiligo: இந்த பாதிப்பால், முகம், கை மற்றும் கால்களில் வெள்ளை புள்ளிகள் தோன்றக்கூடும்.

இது போன்று சில வகைகள் உள்ளன, இதனை ஆரம்ப கட்டத்தில் கண்டறிந்தால் பாதிக்கப்பட்டவரின் வயது, தோலின் தன்மை போன்றவற்றின் அடிப்படையில் அவர்களுக்கு சிகிச்சை அளித்து, இந்த நோயினை சரி செய்ய முடியும். இதற்கு நோயின் தாக்கம் தெரிந்தவுடனே வேறு ஏதும் மருந்துகளையோ, லோஷன்களையோ உபயோகிக்காமல் உடனடியாக மருத்துவரை அணுக வேண்டும்” என்கின்றனர்.

இதையும் படிங்க:ரத்தப் புற்றுநோய் நோயாளிகளையும் காப்பாற்றும் கோவிட் தடுப்பூசி