மாணவர்களை போராட வைப்பது கண்டனத்துக்குரியது - சீனிவாசன் காட்டம்

விருதுநகர்: குடியுரிமை திருத்தச் சட்டத்துக்கு எதிராக மாணவர்களை போராட வைப்பது கண்டனத்துக்குரியது என பாஜக மாநிலச் செயலாளர் சீனிவாசன் தெரிவித்தார்.

விருதுநகர் மாவட்டம் ஸ்ரீவில்லிபுத்தூரில் குடியுரிமை திருத்தச் சட்டத்துக்கு எதிர்ப்பு தெரிவித்து ஜனவரி 30ஆம் தேதியன்று பள்ளி மாணவிகளை மனித சங்கிலி போராட்டத்தில் பங்கேற்க வைத்த திமுக, அதன் கூட்டணி கட்சியினர், பள்ளி தலைமையாசிரியர் மீது நடவடிக்கை எடுக்கக்கோரி பாஜக மாநிலச் செயலாளர் சீனிவாசன் கண்டனங்களை பதிவுசெய்தார்.

தொடர்ந்து செய்தியாளர்களிடம் அவர் பேசியதாவது, "திமுக, காங்கிரஸ், கம்யூனிஸ்ட் போன்ற கட்சிகள் இஸ்லாமியர்களின் குடியுரிமையை பாஜக பறிக்கப் போவதாக பொய் சொல்லி நாடு முழுக்க பதற்றமான சூழலை உருவாக்கியுள்ளனர். உண்மையை தெரிந்து கொண்ட பொதுமக்கள் ஆதரவு இல்லை என்பதால் போராட்டத்துக்கு பள்ளி குழந்தைகளை பயன்படுத்துகின்றனர். இச்செயலை பாஜக வன்மையாக கண்டிக்கிறது.

அமைச்சர் ராஜேந்திர பாலாஜி அந்த உணர்வுகளை உடைத்து ஒரு இந்துவாக பேசியுள்ளார். இந்துவாக பேசுவது மற்றொரு மதத்துக்கு எதிராக பேசுவது அல்ல. அவர் எந்த மதத்தையும் எதிர்த்து பேசவில்லை, நாங்களும் பேசவில்லை. எங்கள் மதத்தை புண்படுத்துகின்ற உரிமை திமுக, காங்கிரஸ், கம்யூனிஸ்ட் கட்சியினருக்கு இல்லை என்று சொல்லிக் கொண்டிருக்கிறோம்.

அதிமுக - பாஜக தேர்தல் நேரத்தில் தான் கூட்டணி. தேர்தலில் ஓட்டுக்களை சிதற விடக்கூடாது, எதிரிகள் வெற்றி பெறக்கூடாது என்பதற்காக ஏற்படுத்திக்கொண்ட ஒப்பந்தம்," இவ்வாறு அவர் கூறினார்.

இதையும் படிங்க: பாஜகவின் மாநில தலைவர் யார்? - பதில் சொல்ல மறுக்கும் வானதி சீனிவாசன்