பொன்னமராவதி விவகாரம்: அருப்புக்கோட்டையில் ஆயிரக்கணக்கான மக்கள் போராட்டம்

விருதுநகர்: ஒரு குறிப்பிட்ட சமூகம் குறித்து இழிவாக பேசி வாட்ஸ் அப்பில் ஆடியோ வெளியான சம்பவத்தை கண்டித்து 1000க்கும் மேற்பட்டோர் சாலை மறியலில் ஈடுபட்டனர்.

பொன்னமராவதியில் ஒரு குறிப்பிட்ட சமூகம் குறித்து இழிவாக பேசி வாட்ஸ் அப்பில் ஆடியோ வெளியான சம்பவத்தைக் கண்டித்தும், அந்த ஆடியோவில் பேசிய இருவரை கைது செய்யக் கோரியும் தமிழ்நாட்டின் பல்வேறு பகுதிகளில் போராட்டங்கள் நடைபெற்று வருகிறது.

இந்நிலையில், ஆத்திப்பட்டி அருகே உள்ள பல்வேறு கிராமங்களைச் சேர்ந்த 1000க்கும் மேற்பட்டோர் இதே கோரிக்கையை முன்வைத்து அருப்புக்கோட்டை- திருச்சுழி நெடுஞ்சாலையில் திடீர் சாலை மறியலில் ஈடுபட்டனர்.

மறியல் சம்பவம் குறித்து தகவல் அறிந்து விரைந்து வந்த அருப்புக்கோட்டை காவல் துணைக் கண்காணிப்பாளர் வெங்கடேஷன் தலைமையிலான காவல் துறையினர் மறியலில் ஈடுபட்டவர்களிடம் பேச்சுவார்த்தையில் ஈடுபட்டனர்.

சம்பவம் தொடர்பாக விரைந்து நடவடிக்கை எடுக்கப்படும் என காவல்துறையினர் உறுதியளித்ததை தொடர்ந்து போராட்டம் கைவிடப்பட்டது.