லாரி சர்வீஸ் உரிமையாளர் வெட்டிப் படுகொலை!

விருதுநகரில் லாரி சர்வீஸ் நடத்திவரும் பால்பாண்டி என்பவர் அடையாளம் தெரியாத நபர்களால் வெட்டிப் படுகொலை செய்யப்பட்டார். இது தொழில் போட்டிக்காக நடந்த கொலையா என்ற கோணத்தில் காவல் துறையினர் விசாரணை மேற்கொண்டுவருகின்றனர்.

விருதுநகர்:ஆத்துமேடு பகுதியில் வசித்துவரும் பால்பாண்டி (61) என்பவர், அசோகன் லாரி செட் என்ற பெயரில் லாரி சர்வீஸ் நடத்திவருகிறார். இந்நிலையில் இன்று விருதுநகர் ரயில்வே பீடர் சாலையில் வந்துகொண்டிருந்த பால்பாண்டியை, அடையாளம் தெரியாத கும்பல் ஒன்று வழிமறித்து, கையில் இருந்த அரிவாள் உள்ளிட்ட பயங்கர ஆயுதங்களால் வெட்டிப் படுகொலை செய்துவிட்டு அங்கிருந்து தப்பியோடியது.

தகவலறிந்து அங்கு சென்ற மேற்கு காவல் நிலைய காவல் துறையினர் உடலை மீட்டு உடற்கூராய்வுக்கு விருதுநகர் அரசு மருத்துவமனைக்கு அனுப்பிவைத்தனர்.

மேலும் இந்தக் கொலை சம்பவம் குறித்து வழக்குப்பதிவு செய்து, கொலைக்குத் தொழில் பகை காரணமா அல்லது வேறு ஏதும் காரணமா என மேற்கு காவல் நிலைய காவல் துறையினர் வழக்குப்பதிவு செய்து விசாரணை நடத்திவருகின்றனர்.

இதையும் படிங்க:'காதலை மறுத்த பெண்' கல்லூரி வளாகத்தில் கொடூரக்கொலை