வீட்டின் அருகே மது அருந்தியதால் ஏற்பட்ட தகராறு - மதிமுக நிர்வாகி வெட்டிக் கொலை

விருதுநகர்: மதுபோதையில் மதிமுக நிர்வாகியை கொலை செய்த நபரை கைது செய்து காவல் துறையினர் விசாரணை மேற்கொண்டு வருகின்றனர்.

விருதுநகர் மாவட்டம் சாத்தூர் அருகே வெங்கடாசலபுரம் கிராமத்தை சேர்ந்தவர் சிவக்குமார் (47). இவர் இந்தப் பகுதியில் தீப்பெட்டி தொழிற்சாலை நடத்திவருகிறார். இவர் மதிமுக கட்சி நிர்வாகியாகவும் உள்ளார். அதே ஊரைச் சேர்ந்த மாரிமுத்து (20) என்பவர் சிவக்குமார் வீட்டின் அருகே அமர்ந்து இரவுவேளையில் மது அருந்துவதை வழக்கமாக வைத்துள்ளார். இதனை சிவக்குமார் அடிக்கடி கண்டித்துள்ளார்.

இந்நிலையில், நேற்று இரவு சிவக்குமார் வீட்டின் அருகே அமர்ந்து மாரிமுத்து மது அருந்தியுள்ளார். அதைப்பார்த்த சிவகுமார், மாரிமுத்துவை கண்டித்து எச்சரித்து அனுப்பியுள்ளார். இதனால் ஆத்திரமடைந்த மாரிமுத்து தனது வீட்டிற்குச் சென்று அரிவாளை எடுத்துவந்து சிவக்குமாரை பின்புறமாக சரமாரியாக வெட்டிவிட்டு தப்பி ஓடியுள்ளார். இதில் பலத்த காயமடைந்த சிவக்குமார் சம்பவ இடத்திலேயே பரிதாபமாக உயிரிழந்தார்.

தகவலறிந்து சம்பவ இடத்திற்கு விரைந்து வந்த சாத்தூர் நகர் காவல் துறையினர் வெட்டுக் காயங்களுடன் உயிரிழந்த நிலையில் கிடந்த சிவகுமாரின் உடலை மீட்டு உடற்கூறாய்விற்காக அரசு மருத்துவமனைக்கு அனுப்பிவைத்தனர்.

மேலும், தப்பி ஓடிய மாரிமுத்துவை கைது செய்த சாத்தூர் நகர காவல் துறையினர் வழக்குப்பதிவு செய்து விசாரணை மேற்கொண்டு வருகின்றனர்.