முன்னாள் மாணவர்களின் கனா காணும் காலங்கள் நிகழ்வு!

விருதுநகர்: சாத்தூரில் அரசு உதவிபெறும் பள்ளியில் மாணவர்கள் சந்திப்பு நிகழ்ச்சியில், 21 ஆண்டுகளுக்கு முன்னால் பயின்ற மாணவ மாணவியர் தங்கள் குடும்பத்தோடு பங்கேற்றனர்.

விருதுநகர் மாவட்டம் சாத்தூரில் அரசு உதவிபெறும் பள்ளியில் 1997ஆம் ஆண்டு கல்வி பயின்ற மாணவ மாணவியர் ஒன்றிணைந்து தங்களது பழைய பள்ளிக்கூட நினைவுகளை நினைவுகூறும் விதமாக பழைய மாணவர்களின் சங்கம் என்ற நிகழ்ச்சியினை புனித தனிஸ்லாஸ் பள்ளியில் நடத்தினார்கள்.

இதில் 21 ஆண்டுகளுக்கு முன்பு பயின்ற மாணவ-மாணவியர் தங்களது குடும்பத்தினருடன் வந்து பழைய நண்பர்கள், ஆசிரியர்களை ஒருவருக்கொருவர் சந்தித்துக் கொண்டனர்.

நிகழ்ச்சியில் கற்றுக்கொடுத்த ஆசிரிய பெருமக்களை பெருமைப்படுத்தும் விதமாக பொன்னாடை போர்த்தி நினைவுப் பரிசுகளும் வழங்கப்பட்டன.

மேலும் ஒன்றாக இணைந்து மதிய உணவு உண்டு, மாலை வரை பள்ளி கால நகைச்சுவை நிகழ்வுகளை நினைவுகூர்ந்து மகிழ்ந்தனர். இறுதியில் மாலையில் 21 ஆண்டு நினைவைக் கொண்டாடும் விதமாக அனைவரும் ஒன்றுகூடி 21 மரக்கன்றுகளை நட்டனர்.