கலர் மத்தாப்பு தொழிற்சாலையில் தீ விபத்து: இருவருக்கு லேசான தீக்காயம்

விருதுநகர்: சிவகாசி கலர் மத்தாப்பு தொழிற்சாலையில் ஏற்பட்ட தீ விபத்தில் இரண்டு தொழிலாளர்களுக்கு லேசான காயம் ஏற்பட்டது.

விருதுநகர் மாவட்டம் சிவகாசி அருகே ஈஞ்சார் கிராமத்தில் கோபால் என்பவருக்கு சொந்தமான காளீஸ்வரி கலர் மேட்ச் வொர்க்ஸ் என்ற கலர் மத்தாப்பு தயாரிக்கும் தொழிற்சாலை இயங்கி வருகிறது. இங்கு நூற்றுக்கும் மேற்பட்ட ஆண் பெண் தொழிலாளர்கள் கலர் மத்தாப்பு தயாரிக்கும் பணியில் ஈடுபட்டு வருகின்றனர்.

இந்த நிலையில், இன்று (ஜூன்.26) கலர் மத்தாப்பு கழிவுப்பொருள்களை தொழிற்சாலையின் வெளி வளாக மைதானத்தில் குவித்து வைத்து எரிக்கப்பட்டதாக கூறப்படுகிறது. அப்போது தீ வேகமாக பரவியது. இதில் காளிதாஸ் (35), அர்ஜூன் (26) என இரண்டு தொழிலாளர்களுக்கு லேசான தீ காயம் ஏற்பட்டது. இதனையடுத்து அவர்களை அங்கிருந்தவர்கள் மீட்டு அருகில் இருந்த தனியார் மருத்துவமனையில் சிகிச்சைக்காக சேர்த்தனர்.

இந்த தீ விபத்து குறித்து அறிந்த சிவகாசி தீயணைப்பு படையினர் சம்பவ இடத்திற்கு விரைந்து சென்று மென்மேலும் அருகில் உள்ள கட்டிடங்களுக்கு தீ பரவாமல் தடுத்து நிறுத்தி தீயை அணைத்தனர். இதன் காரணமாக பெரும் விபத்து தவிர்க்கப்பட்டது. விபத்து குறித்து வருவாய்துறை அலுவலர்கள் நேரில் பார்வையிட்டு ஆய்வு மேற்கொண்டனர். மேலும் தீ விபத்து குறித்து திருத்தங்கல் காவல் நிலைய காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.