வலுக்கட்டாயமாக சிறுவர்கள் வாயில் மது ஊற்றும் இளைஞர்கள் - வெளியான சிசிடிவி காட்சி!

விருதுநகர்: விவேகானந்தர் தெருவைச் சேர்ந்த இளைஞர்கள், அப்பகுதியில் செல்லும் சிறுவர்களை அழைத்து அவர்களது வாயில் வலுக்கட்டாயமாக மது ஊற்றும் வீடியோ சமூக வலைதளங்களில் வைரலாகி பரபரப்பை ஏற்படுத்தியுள்ளது.

அண்மைக்காலமாக சிறுவர்கள் மீதான பாலியல் குற்றங்கள், துன்புறுத்தல்கள் அதிகரித்து வருகின்றன. அதேபோல், விருதுநகரில் கல்லூரி மாணவர்கள், இளைஞர்கள் ஒன்றுகூடி பிறந்தநாள் கொண்டாட்டமாக பொது இடங்களில் பட்டாக்கத்தியுடன் கேக் வெட்டும் வீடியோ சமூக வலைதளத்தில் வைரலாகி பரபரப்பை ஏற்படுத்தியது. இது தொடர்பாக கல்லூரி மாணவர்கள் 7 பேர் கைது செய்யப்பட்டனர்.

இதனிடையே, விருதுநகர் விவேகானந்தர் தெருவில் இளைஞர்கள் சிலர் மது அருந்திக் கொண்டிருந்தனர். அப்போது, அந்த வழியாக நடந்துச் சென்ற சிறுவர்களை பிடித்து அவர்களது வாயில் வலுக்கட்டாயமாக இளைஞர்கள் மது ஊற்றினர். இந்த காட்சி அருகில் உள்ள சிசிடிவி கேமராவில் பதிவாகியுள்ளது.

தற்போது இந்த வீடியோ வைரலாகி பரபரப்பை ஏற்படுத்தியுள்ளது. இந்த வீடியோ காட்சிகளை ஆதாரமாகக்கொண்டு சம்பந்தப்பட்ட நபர்களை விருதுநகர் மேற்கு காவல்துறையினர் தேடி வருகின்றனர்.

இதையும் படிங்க: பட்டா கத்தியுடன் பிறந்தநாள் கொண்டாட்டம் - கல்லூரி மாணவர்கள் 7 பேர் கைது!