தேர்தல் முடிவுகள்: வடக்கு மண்டலத்தின் கடந்த கால வரலாறு

தமிழ்நாட்டின் தலை எழுத்தை அடுத்த ஐந்து வருடங்களுக்கு எழுதப்போவது யார் என்பதற்கான விடை இன்று தெரிந்துவிடும். இதற்கு முன் இரண்டு கழகங்களும், மற்ற கட்சிகளும் தமிழ்நாட்டின் ஒவ்வொரு தொகுதியிலும் எத்தனை முறை வென்றிருக்கின்றன?

வடக்கு மண்டலம்:

வடக்கு மண்டலம் திமுகவின் கோட்டை என வர்ணிக்கப்படுது உண்டு. அதை நிரூபிக்கும் வண்ணமே உள்ளது முந்தைய தேர்தல் வெற்றிகள். சென்னை மாவட்டத்தின் தொகுதிகள், சென்னையின் பகுதிகளாக அறியப்படும் அண்டைமாவட்ட தொகுதிகளான 10 தொகுதிகள் நீங்கலாக, திருவள்ளூர், செங்கல்பட்டு, காஞ்சிபுரம், ராணிப்பேட்டை, வேலூர், திருப்பத்தூர், திருவண்ணாமலை, விழுப்புரம், கள்ளக்குறிச்சி, கடலூர் ஆகிய மாவட்டங்களின் 52 தொகுதிகளை உள்ளடக்கியது இந்த மண்டலம்.

டெல்டா மாவட்டங்களுக்கு வடக்கே, கிழக்கு கடற்ககையோர மாவட்டங்கள், ஆந்திர எல்லையோர மாவட்டங்களை உள்ளடக்கியது வடக்கு மண்டலம். காஞ்சிபுரம், செங்கல்பட்டு, திருவள்ளூர் மாவட்டங்களை தவிர ஏனைய மாவட்டங்கள் விவசாயத்தை பிரதானமாக கொண்டவை.

வடக்கு மாவட்டங்களில் வன்னியர்கள், தலித்களின் வாக்கு வங்கிகள் வெற்றி தோல்வியை தீர்மானிப்பதில் முக்கிய பங்கு வகிக்கின்றன. வடக்கு மாவட்டங்களான விழுப்புரம், கடலூர் உள்ளிட்ட பகுதிகளில் பாமகவின் வாக்கு வங்கி கணிசமான அளவில் இருக்கிறது.

பறவைக் கோணம்:

வடக்கு மண்டலத்தில் இருக்கும் திருவள்ளூர் மாவட்டம் கும்மிடிப்பூண்டியில் 1967ஆம் ஆண்டிலிருந்து 2016ஆம் ஆண்டுவரை நடந்த சட்டப்பேரவைத் தேர்தலில், அதிமுக ஏறு முறையும், திமுக நான்கு முறையும் வென்றிருக்கின்றன. 2011ஆம் ஆண்டு தேர்தலில் மட்டும் தொகுதியை தேமுதிக கைப்பற்றியிருக்கிறது.

அதேபோல், பொன்னேரி (தனி) தொகுதியை அதிமுக ஏழு முறையும், திமுக நான்கு முறையும், சிபிஐ ஒரு முறையும் கைப்பற்றியிருக்கின்றன.

திருத்தணியைப்ப் பொறுத்தவரை அதிமுக ஆறு முறை, திமுக மூன்று முறை, காங்கிரஸ், பாமக, தேமுதிக தலா ஒரு முறை வென்றிருக்கின்றன. இதில் காங்கிரஸ் கட்சி கடைசியாக 1967ஆம் ஆண்டு திருத்தணியில் வென்றிருக்கிறது. மேலும் திருவள்ளூரில் அதிமுக ஐந்து முறை, திமுக ஆறு முறை, தமாகா ஒரு முறை தொகுதியை கைப்பற்றியிருக்கிறது.

செங்கல்பட்டு மாவட்டத்தின் செங்கல்பட்டு, திருப்போரூர் ஆகிய தொகுதிகளில் திமுக கடந்த தேர்தல்களில் அதிக முறை வென்றிருக்கின்றன. செங்லப்பட்டை திமுக ஐந்து முறை, அதிமுக நான்கு முறையும், திருப்போரூரை திமுக ஆறு முறை, அதிமுக ஐந்து முறையும் கைப்பற்றியிருக்கின்றன. செய்யூரைப் (தனி) பொறுத்தவரை 2011ல் அதிமுகவும், 2016ல் திமுகவும் வென்றிருக்கின்றன.

NORTH mandalam

காஞ்சிபுரம் மாவட்டத்தில் இருக்கும் மதுராந்தகம் (தனி), ஸ்ரீபெரும்புதூர் (தனி) ஆகிய தொகுதிகளில் திமுகவின் கொடியே அதிக முறை பறந்துள்ளது. அதேசமயம், உத்திரமேரூர் தொகுதியை அதிமுகவும், திமுகவும் தலா ஆறு முறை கைப்பற்றியிருக்கின்றன. அண்ணா பிறந்த ஊரான காஞ்சிபுரத்தில் மட்டும் அதிமுக தனது தடத்தை ஆறு முறை இதுவரை பதித்துள்ளது. திமுக ஐந்து முறை வென்றிருக்கிறது.

வேலூர் மாவட்டத்திலிருந்து ராணிப்பேட்டை மாவட்டம் 2019ஆம் ஆண்டு பிரிக்கப்பட்டது. இந்த மாவட்டத்தில் அரக்கோணம் (தனி), சோளிங்கர், ராணிப்பேட்டை, ஆற்காடு ஆகிய சட்டப்பேரவைத் தொகுதிகள் இடம்பெற்றுள்ளன.

NORTH mandalam

இந்த மாவட்டத்தைப் பொறுத்தவரை அரக்கோணம் மற்றும் சோளிங்கரில் அதிமுக தலா ஐந்து முறை வென்றிருக்கிறது. திமுக அரக்கோணத்தை ஆறு முறையும், சோளிங்கரை ஒரு முறையும் கைப்பற்றியிருக்கிறது.

அதேசமயம் ராணிப்பேட்டை, ஆற்காட்டை திமுக தலா ஐந்து முறை கைப்பற்றியுள்ளது.

வேலூர் மாவட்டத்தைப் பொறுத்தவரை காட்பாடி மற்றும் வேலூர் தனது கோட்டை என்பதை திமுக அதிக முறை நிரூபித்துள்ளது. (காட்பாடியில் 8 முறை, வேலூரில் 6 முறை வெற்றி)

வடக்கு மண்டலத்தில் 2011ஆம் ஆண்டு உருவாக்கப்பட்ட செய்யூர்(தனி), கேவிகுப்பம்(தனி), ஆம்பூர், ஜோலார்பேட்டை, கீழ்பெண்ணாத்தூர், மயிலம், விக்கிரவாண்டி, திட்டக்குடி(தனி), நெய்வேலி ஆகிய தொகுதிகள் 2011ஆம் ஆண்டில் உருவாக்கப்பட்டவை.

NORTH mandalam

இந்த தொகுதிகள் சந்தித்திருக்கும் இரண்டு பேரவைத் தேர்தல்களில், கே.வி.குப்பம், ஜோலார்பேட்டை தொகுதிகளை அதிமுக கைப்பற்றியுள்ளது. செய்யூர் தனித் தொகுதி, கீழ்பெண்ணாத்தூர்,மயிலம், நெய்வேலி தொகுதிகளில் அதிமுகவும் திமுகவும் தலா ஒரு முறை வெற்றி பெற்றுள்ளன.

திட்டக்குடி தனித்தொகுதி வெற்றியை தேமுதிகவுடன் பகிர்ந்துள்ளது அதிமுக. அணைக்கட்டு தொகுதியை அதிமுக ஆறு முறையும், திமுக மூன்ற முறையும் கைப்பற்றியுள்ளன.

அதேபோல் திருப்பத்தூர் தொகுதியைப் பொறுத்தவரை உதயசூரியன் அங்கே ஏழு முறை உதித்துள்ளது. இரட்டை இலை இரண்டு முறை மலர்ந்துள்ளது.

திருவண்ணாமலை மாவட்டம்:

இந்த மாவட்டத்தில், செங்கம் (தனி), திருவண்ணாமலை, கீழ்பெண்ணாத்தூர் (2011ஆம் ஆண்டு உதயமான தொகுதி), கலசப்பாக்கம், போளூர், ஆரணி, செய்யாறு, வந்தவாசி ஆகிய 8 சட்டப்பேரவைத் தொகுதிகள் இருக்கின்றன.

திருவண்ணாமலை மாவட்ட நிலவரத்தை பொறுத்தவரை திமுகவே அதிக முறை வென்றுள்ளது. குறிப்பாக திருவண்ணாமலை சட்டப்பேரவைத் தொகுதியில் 1967லிருந்து 2016 தேர்தல்வரை அதிமுக ஒரு முறைகூட வெல்லாதது அத்தொகுதியில் அதிமுகவின் மோசமான நிலையை உணர்த்துகிறது. திமுகவோ எட்டு முறை கைப்பற்றியிருக்கிறது.

அதேபோல், செங்கத்தில் 4, கலசபாக்கத்தில் 6, போளூரில் 5, ஆரணியில் 5, செய்யாறு, வந்தவாசியில் தலா 6 முறை திமுக வென்றுள்ளது. அதிமுக ஆரணியில் மட்டுமே திமுகவை அதிமுக முந்துகிறது. அத்தொகுதியில் ஆறு முறை அக்கட்சி வென்றுள்ளது.

விழுப்புரம் மாவட்டம்:

விழுப்புரம் மாவட்டத்தில், செஞ்சி, மயிலம் (2011ஆம் ஆண்டு உதயமான தொகுதி), திண்டிவனம் (தனி), வானூர், விழுப்புரம், விக்கிரவாண்டி (2011ஆம் ஆண்டு உதயமான தொகுதி), திருக்கோவிலூர் ஆகிய 7 சட்டப்பேரவைத் தொகுதிகள் இருக்கின்றன. விழுப்புரம் மாவட்டத்திலும் திமுகவே அதிக முறை வெற்றி பெற்றுள்ளது. காட்பாடியைப் போலவே செஞ்சியிலும் திமுக எட்டு முறை வெற்றி பெற்றுள்ளது. வானூரில் திமுகவும், அதிமுகவும் தலா 6 முறை வெற்றியடைந்துள்ளன.

கள்ளக்குறிச்சி மாவட்டம்:

2019ஆம் ஆண்டு பிரிக்கப்பட்ட கள்ளக்குறிச்சி மாவட்டத்தில், உளுந்தூர்பேட்டை, ரிஷிவந்தியம், சங்கராபுரம், கள்ளக்குறிச்சி ஆகிய நான்கு சட்டப்பேரவைத் தொகுதிகள் வருகின்றன. உளுந்தூர்பேட்டை, சங்கராபுரத்தில் திமுக தலா 6 முறையும், ரிஷிவந்தியத்தில் நான்கு முறையும் வெற்றியை அடைந்திருக்கிறது. கள்ளக்குறிச்சியைப் பொறுத்தவரை திமுகவும், அதிமுகவும் தலா 2 முறை வெற்றி பெற்றிருக்கின்றன.

கடலூர் மாவட்டம்:

கடலூர் மாவட்டத்தில், திட்டக்குடி (தனி), விருத்தாசலம், நெய்வேலி, பண்ருட்டி, கடலூர், குறிஞ்சிப்பாடி, புவனகிரி, சிதம்பரம், காட்டுமன்னார்கோயில் (தனி) ஆகிய ஒன்பது சட்டப்பேரவைத் தொகுதிகள் இருக்கின்றன. இவைகளில், 2011ஆம் ஆண்டு உதயமான திட்டக்குடியில் திமுகவும் தேமுதிகவும் தலா ஒரு முறை நெய்வேலியில் திமுகவும், அதிமுகவும் தலா ஒரு முறை, பண்ருட்டியில் திமுக, அதிமுக தலா நான்கு முறையும், பாமக 3 முறையும், சிதம்பரம் தொகுதியில் திமுக, அதிமுக தலா 4 முறையும் வென்றுள்ளன. மற்றபடி, குறிஞ்சிப்பாடியில் 8 முறை, கடலூரில் 7 முறை, காட்டுமன்னார்கோவிலில் 5 முறை திமுகவும், புவனகிரியில் 5 முறை, விருத்தாச்சலத்தில் 3 முறை அதிமுகவும் வெற்றிக்கொடியை ஏற்றியுள்ளன.

2016ஆம் ஆண்டு தேர்தல் நிலை:

தமிழ்நாட்டின் கடந்த சட்டப்பேரவைத் தேர்தலில், வடக்கு மண்டலத்தில் உள்ள 52 தொகுதிகளில் திமுக 28 தொகுதிகளை கைப்பற்றியுள்ளது. அதே சமயம் அதிமுகவும் 24 தொகுதிகளை கைப்பற்றி திமுகவை நெருங்கியுள்ளது. ஆகமொத்தம், வடக்கு மண்டலத்தில் திமுக தனது தடத்தை ஆழமாக பதித்திருக்கிறது என்பதை கடந்த கால தேர்தல் வரலாறு சொல்கிறது.