விழுப்புரம் மாவட்டம் திருவெண்ணெய்நல்லூர் அருகே உள்ள அரசூர் கூட்ரோட்டில் அனைத்துக் கட்சி, விழுப்புரம் இணைப்புக் குழு சார்பில், விழுப்புரம் அருகே உள்ள திருவெண்ணெய்நல்லூர், திருநாவலூர், முகையூர் பகுதிகளை விழுப்புரம் மாவட்டத்தில் இணைக்க வேண்டும், திருவெண்ணெய்நல்லூர் பகுதிகளை தாலுகாவாக அறிவிக்க வேண்டும்.
விழுப்புரத்திலிந்து 30 கி.மீ. தொலைவில் உள்ள அனைத்துப் பகுதிகளையும் விழுப்புரம் மாவட்டத்திலேயே இணைக்க தமிழ்நாடு அரசு நடவடிக்கை எடுக்க வேண்டும் என்பதை வலியுறுத்தி மாபெரும் கையெழுத்து இயக்கப் போராட்டம் நடைபெற்றது.
இந்தக் கையெழுத்து இயக்கப் போராட்டத்தினை விழுப்புரம் தேமுதிக மாவட்ட செயலாளரும் முன்னாள் எம்எல்ஏவுமான வெங்கடேசன், முதல் கையெழுத்திட்டு தொடங்கிவைத்து சிறப்புரை ஆற்றினார்.
அப்போது அவர் பேசுகையில், "விழுப்புரம் மாவட்டம் மிகப்பெரிய மாவட்டம். இம்மாவட்டத்தை இரண்டாகப் பிரிக்க வேண்டும் என்று 2007ஆம் ஆண்டு முதல் தேமுதிக குரல் கொடுத்துவருகிறது. திருவெண்ணெய் நல்லூரை தாலுகாவாக அறிவிக்க வேண்டும். கள்ளக்குறிச்சி பகுதி மக்களுக்கு புதிய மாவட்டம், அடிப்படைத் தேவைகளை நிறைவேற்றிக் கொள்வதற்கு ஆட்சியர் அலுவலகம் எப்படி தேவையோ; அதேபோல, விழுப்புரம் அருகே உள்ள திருவெண்ணெய்நல்லூர், முகையூர், அரசூர், மடப்பட்டு, சித்தலிங்கமடம் பகுதி மக்கள் விழுப்புரம் வேண்டுமென்று விரும்புகின்றனர்.
திருவெண்ணெய்நல்லூர், அரசூர் பகுதி மக்கள் 100 கி.மீ. தொலைவிலுள்ள கள்ளக்குறிச்சி சென்றுவர சிரமம் உள்ளது. அரசு ஆட்சியாளர்கள், அலுவலர்கள், மக்கள் எதை விரும்புகிறார்களோ மக்கள் விருப்பத்தினை நிறைவேற்றும் வகையில்தான் மாவட்டம் பிரிக்க வேண்டும். கள்ளக்குறிச்சியில் தனிஅலுவலராக நியமிக்கப்பட்டுள்ள கிரன் குரலா, இதுவரை கள்ளக்குறிச்சியை விட்டு வேறு எங்கும் சென்றதில்லை.
மக்களின் கருத்தையோ, விருப்பத்தையோ கேட்டதில்லை. அந்தந்த பகுதி மக்களின் கருத்து கேட்கும் வகையில் பொதுவாக்கெடுப்பு நடத்த வேண்டும். இந்தப் பகுதி மக்கள் விழுப்புரத்தில் இணைவதை விரும்புகின்றனர். இதனை நிறைவேற்றுவதற்கு தமிழ்நாடு அரசு உரிய நடவடிக்கை எடுக்க வேண்டும்" என்றார்.
