தேமுதிகவினர் மீது பொய் வழக்கு : காவல் நிலையம் முற்றுகை!

விழுப்புரம் : பொய் வழக்கு பதிவு செய்ததாகக் கூறி செஞ்சி காவல் நிலையத்தின் முன் 500க்கும் மேற்பட்ட தேமுதிகவினர் முற்றுகைப் போராட்டத்தில் ஈடுபட்டனர்.

விழுப்புரம் மாவட்டம், ஆனத்தூர் கிராமத்தில் சில நாள்களுக்கு முன்பு தேமுதிக சார்பில் ஏற்கனவே அமைக்கப்பட்டிருந்த கொடிக்கம்பத்தில் பாஜகவினர் தங்களது கட்சிக் கொடியை ஏற்றி உள்ளனர். இது குறித்து தேமுதிகவினர் கேட்டதற்கு பாஜகவினர் சரியான பதில் அளிக்கவில்லை என்று கூறப்படுகிறது. இதனிடையே பாஜகவினரின் கொடிக்கம்பம் அடையாளம் தெரியாத நபர்கள் சிலரால் சேதப்படுத்தப்பட்டது.

கொடிக்கம்பத்தை சேதப்படுத்தியது யார் என்றே தெரியாமல் தேமுதிகவினர் மீது பாஜகவினர் செஞ்சி காவல் நிலையத்தில் புகார் அளித்தனர். அந்தப் புகாரின் அடிப்படையில் தேமுதிக நிர்வாகிகள் நான்கு பேர் மீது செஞ்சி காவல் துறையினர் வழக்குப்பதிவு செய்துள்ளனர்.

இந்நிலையில், உரிய விசாரணை நடத்தாமல் தேமுதிகவினர் மீது வழக்குப்பதிவு செய்ததால் ஆத்திரமடைந்தத அக்கட்சியினர் 500க்கும் மேற்பட்டோர் மாவட்டச் செயலர் எல்.வெங்கடேசன் தலைமையில் ஒன்று திரண்டனர்.

பின்னர் தேமுதிகவினர்மீது பதியப்பட்ட பொய் வழக்கை திரும்பப்பெற வேண்டும் என வலியுறுத்தி அவர்கள் கண்டன முழக்கங்களை எழுப்பினர். இதையடுத்து தேமுதிகவின் முக்கிய நிர்வாகிகளை அழைத்துப் பேசிய காவல் துறையினர், பாஜக நிர்வாகிகள் மீதும் வழக்குப்பதிவு செய்தனர். இதனால் அங்கு பரபரப்பான சூழல் நிலவியது.