ரத்தம் படிந்த பாய், சவுக்கு கட்டைகள்; அன்புஜோதி ஆசிரமத்தில் தடயங்களை சேகரித்த சிபிசிஐடி

விழுப்புரம் அன்புஜோதி ஆசிரமத்தில் மனநலம் பாதிக்கப்பட்ட பெண்களுக்கு பாலியல் தொல்லை அளித்த வழக்கு சிபிசிஐடிக்கு மாற்றப்பட்ட நிலையில் இன்று சிபிசிஐடி போலீசார், தடயவியல் நிபுணர்கள் ஆய்வில் ஈடுபட்டு ஆசிரமத்தில் தடயங்களை சேகரித்தனர்.

விழுப்புரம்: விக்கிரவாண்டியை அடுத்த குண்டலப்புலியூரில் அரசின் உரிய அனுமதி இன்றி அன்புஜோதி என்ற பெயரில் ஆசிரமம் இயங்கி வந்தது. இந்த ஆசிரமத்தை கேரள மாநிலம் எர்ணாகுளம் ஆழக்கூடா பகுதியை சேர்ந்த 45 வயது நபர் கடந்த 2004ஆம் ஆண்டு முதல் நடத்தி வந்துள்ளார். இங்கு மனநலம் பாதிக்கப்பட்டவர்கள், ஆதரவற்றவர்களை அடைத்து வைத்து இரும்புச் சங்கிலியால் கட்டிப்போட்டு அடித்து சித்ரவதை செய்தது தொடர்பாகவும், அங்கிருந்த மனநலம் பாதிக்கப்பட்ட பெண்கள் பாலியல் வன்கொடுமைக்கு உள்ளாக்கப்பட்டது தொடர்பாகவும் எழுந்த புகாரின்பேரில் ஆசிரம நிர்வாகி கைது செய்யப்பட்டார். அதன்பின் அவரது மனைவி உள்பட 9 பேரை கெடார் போலீசார் கைது செய்தனர்.

அங்கிருந்த 143 பேர் மீட்கப்பட்டு, விழுப்புரம் அரசு மருத்துவக் கல்லூரி மருத்துவமனையில் சிகிச்சை அளிக்கப்பட்டு பல்வேறு ஆசிரமங்களுக்கு அனுப்பி வைக்கப்பட்டனர். ஆசிரமத்தில் இருந்து மாயமான 11 பேரின் கதி என்ன என்பது பற்றி தெரியவில்லை. தமிழகத்தில் பெரும் பரபரப்பை ஏற்படுத்திய இந்த ஆசிரம வழக்கை, சிபிசிஐடி போலீசாரின் விசாரணைக்கு மாற்றி டிஜிபி சைலேந்திரபாபு உத்தரவிட்டார்.

அதன்படி ஆசிரமம் சம்பவம் தொடர்பாக கெடார் போலீஸ் நிலையத்தில் இதுவரை 7 வழக்குகள் பதிவு செய்யப்பட்ட நிலையில் அந்த வழக்குகளின் முதல் தகவல் அறிக்கைகள், வழக்கு தொடர்பான ஆவணங்கள், பொருட்கள் அனைத்தும் போலீஸ் சூப்பிரண்டு ஸ்ரீநாதா, கூடுதல் போலீஸ் சூப்பிரண்டுகள் கோவிந்தராஜ், தேவராஜ் ஆகியோர் முன்னிலையில் நேற்று மாலை சிபிசிஐடி போலீசாரிடம் ஒப்படைக்கப்பட்டது.

இதனைத்தொடர்ந்து நேற்று மாலையே சிபிசிஐடி போலீசார் விசாரணையை தொடங்கினர். இவ்வழக்கை விசாரிப்பதற்காக விசாரணை அதிகாரிகளாக நியமிக்கப்பட்ட சிபிசிஐடி கூடுதல் போலீஸ் சூப்பிரண்டு கோமதி, இன்ஸ்பெக்டர்கள் விழுப்புரம் ரேவதி, சேலம் குமார், கார்த்திகேயன், திருவண்ணாமலை தனலட்சுமி ஆகியோர் விசாரணையை தொடங்கியுள்ளனர்.

கெடார் போலீசார் ஒப்படைத்த வழக்கின் முதல் தகவல் அறிக்கைகள் மற்றும் விசாரணை தொடர்பான ஆவணங்களை ஆய்வு செய்து விசாரணையை தொடங்கினர். இந்நிலையில் இன்று காலையில் காப்பகத்தில் சிபிசிஐடி போலீசார் ஆய்வு செய்தனர். சிபிசிஐடி எஸ்பி அருண் பாலகோபாலன், ஏடிஎஸ்பி கோமதி தலைமையிலான குழுவினர் காலை 10.30 மணி முதல் 3 மணிநேரம் ஆய்வு செய்தனர்.

இவர்களுடன் விழுப்புரம் தடவியல்துறை துணை இயக்குனர் சண்முகம் தலைமையிலான குழுவினர், காப்பகத்தில் ஒவ்வொரு அறைகளாக தடயங்களை சேகரித்தனர். ரத்தக்கறை படிந்த பாய், ஆசிரமத்தில் இருந்தவர்களை தாக்க பயன்படுத்தப்பட்ட சவுக்கு கம்பு, குப்பையில் வீசப்பட்ட பல்வேறு வகையான மாத்திரைகள், துணிகள் போன்ற ஆதாரங்களை தடயவியல் நிபுணர் குழுவினர் சேகரித்தனர்.

மேலும் ஆசிரம நிர்வாகி ஜூபின்பேபி, அவரது மனைவி மரியா ஜூபின் உள்ளிட்ட கைதான 9 பேரையும் காவலில் எடுத்து விசாரிக்க சிபிசிஐடி போலீசார் முடிவு செய்துள்ளனர். இதற்காக விழுப்புரம் கோர்ட்டில் சிபிசிஐடி போலீசார் மனுதாக்கல் செய்ய உள்ளனர். மேலும் ஆசிரம நிர்வாகியின் நண்பரான ஆட்டோ ராஜா என்பவர் பெங்களூரில் நடத்தி வந்த ஆசிரமத்தில் சில முறைகேடுகள் நடைபெற்றுள்ளது விசாரணையில் தெரியவந்துள்ளது.

மேலும் அவரிடம் பெங்களூர் சென்று உரிய விசாரணை நடத்த சிபிசிஐடி போலீசார் முடிவு செய்துள்ளனர். அவர் விசாரணைக்கு ஒத்துழைக்காத பட்சத்தில் அவரை தமிழகம் கொண்டு வந்து தீவிர விசாரணை மேற்கொள்ள காவல் துறை அதிகாரிகள் திட்டமிட்டுள்ளனர். மேலும் முன்னர் நடைபெற்ற விசாரணையில் ஜுபின் பேபி அளித்த தகவலின் அடிப்படையில் 16 பேர் பெங்களூர் ஆசிரமத்திற்கு அனுப்பி வைக்கப்பட்டுள்ளனர் என்றும், அதற்குண்டான அனுமதி சீட்டு தன்னிடம் இருப்பதாகவும் விசாரணையில் தெரிவித்திருந்தார்.

ஆனால் அங்கு சென்று விசாரணை செய்தபோது 16 பேர் அங்கு இல்லை என்கிற விவரம் தெரியவந்துள்ளது. அவர்கள் அனைவரும் உண்மையாகவே தப்பி சென்றனரா அல்லது அவர்களுக்கு வேறு ஏதேனும் அசம்பாவிதம் நடைபெற்றதா என போலீசார் தீவிரமாக விசாரணை மேற்கொண்டு வருகின்றனர். மேலும் சென்னை உயர்நீதிமன்றம் பிறப்பித்த ஆட்கொணர்வு மனு மீதான ஜாபருல்லா இந்தியாவில் உள்ளாரா அல்லது வெளிநாடு ஏதேனும் தப்பிச் சென்றாரா என்கிற கோணத்தில் தேசிய புலனாய்வுத் துறை விசாரணை மேற்கொள்ள உள்ளது.