ரோந்து வாகன GPS-ஐ ஆஃப் செய்ததாகப் புகார் - SI உள்பட இரு காவலர்கள் ஆயுதப்படைக்கு மாற்றம்

வடக்கு காவல் நிலைய எஸ்ஐ குமார் மற்றும் குற்றப்பிரிவு காவலர் ஐயப்பன் ஆகியோர் சென்ற இரவு ரோந்து வாகனத்தில் ஜிபிஎஸ்ஸை காவலர்களே ஆஃப் செய்தது தெரியவந்துள்ளது. இதனால் இருவரையும் ஆயுதப்படைக்கு மாற்றி வேலூர் எஸ்.பி. ராஜேஷ் கண்ணன் உத்தரவிட்டுள்ளார்.

வேலூர்மாவட்டத்தில் ரோந்துப்பணியில் ஈடுபட போலீசாருக்கு ஜிபிஎஸ் கருவி பொருத்தப்பட்ட ரோந்து வாகனம், மாவட்ட காவல் துறையால் வழங்கப்பட்டுள்ளது. ஜிபிஎஸ் கருவி பொருத்தப்பட்டுள்ளதால், ரோந்து வாகனம் எந்த இடத்தில் இருக்கிறது என்பதை மாவட்ட காவல் துறை கண்காணிப்பாளர்(எஸ்.பி) அலுவலகத்தில் இருந்து கண்காணிக்க முடியும்.

இந்த நிலையில், வேலூர் வடக்கு காவல் நிலையத்துக்கு உட்பட்ட பகுதிகளில் இரவு ரோந்து செல்லும், வடக்கு காவல் நிலைய உதவி ஆய்வாளர் குமார் மற்றும் குற்றப்பிரிவு காவலர் ஐயப்பன் ஆகியோர் சென்ற இரவு ரோந்து வாகனத்தில் (டூ வீலர்) ஜிபிஎஸ் (GPS) சிக்னல் கட் ஆகியுள்ளது.

இதுகுறித்து மாவட்ட காவல்துறை கட்டுப்பாட்டு அறையில் உள்ள காவலர்கள் வேலூர் எஸ்பி ராஜேஷ் கண்ணனிடம் புகார் தெரிவித்துள்ளனர். அதன் பின்னர் விசாரணையில் ரோந்து வாகனத்தில் இருந்த ஜிபிஎஸ்ஸை (GPS) காவலர்களே ஆஃப் செய்தது தெரியவந்துள்ளது. அதைத்தொடர்ந்து இருவரையும் ஆயுதப்படைக்கு மாற்றி வேலூர் எஸ்.பி. ராஜேஷ் கண்ணன் உத்தரவிட்டுள்ளார்.