தமிழ்நாடு

tamil nadu

ETV Bharat / state

Tiruvannamalai ATM Robbery: "நூலிழையில் தப்பிய முக்கிய குற்றவாளி" காவல்துறை அளித்த தகவல்! - ATM

திருவண்ணாமலை தொடர் ஏடிஎம் கொள்ளை வழக்கின் முக்கிய குற்றவாளி நூலிழையில் தப்பியதால் கே.ஜி.ஃப் பகுதியில் வேலூர் மாவட்ட காவல் கண்காணிப்பாளர் தலைமையிலான தனிப்படை போலீசார் முகாமிட்டுள்ளனர்.

தி.மலை ATM கொள்ளை
தி.மலை ATM கொள்ளை

By

Published : Feb 17, 2023, 7:08 AM IST

வேலூர்: திருவண்ணாமலை மாவட்டத்தில் கடந்த 13ஆம் தேதி நள்ளிரவு 1.19 மணிக்குத் தொடங்கி அதிகாலை 4.20 மணிக்குள் நான்கு ஏடிஎம் மையங்களில் வெல்டிங் இயந்திரங்கள் மூலம் ஏடிஎம் இயந்திரங்களை உடைத்து ரூ.73 லட்சம் பணம் கொள்ளையடிக்கப்பட்டது. டாடா சுமோ காரில் வந்த முகமூடி கொள்ளை கும்பலைப் பிடிக்க வேலூர் சரக டிஐஜி முத்துசாமி தலைமையில் 5 காவல் கண்காணிப்பாளர்கள் மேற்பார்வையில் தனிப்படை அமைக்கப்பட்டு விசாரணை நடத்தப்பட்டு வருகின்றன.

இந்த வழக்கில் தொடர்புடைய கொள்ளையர்கள் ஹரியானா மாநிலம் மேவாத் பகுதியைச் சேர்ந்த பிரபல கொள்ளை கும்பலாக இருக்கலாம் எனக் காவல் துறையினர் கருதி வருகின்றனர். போளூரில் தனிப்படையினர் நடத்திய முதற்கட்ட விசாரணையில் கொள்ளையர்கள் சுங்கச்சாவடி இருந்து தேவிகாபுரம், ஆரணி, ஆற்காடு, ராணிப்பேட்டை, பொன்னை, சித்தூர். பலமனேரி வழியாகக் கர்நாடக மாநிலம் கே.ஜி.ஃப் சென்றது தெரியவந்துள்ளது.

மேலும், கொள்ளையர்களைப் பிடிக்க டிஎஸ்பிக்கள் தலைமையில் சென்ற தனிப்படையினர் ஹைதராபாத், நாக்பூர், அகமதாபாத், ஹரியானாவில் துப்பாக்கிகளுடன் முகாமிட்டுள்ளனர். ஏடிஎம் கொள்ளை கும்பல் கர்நாடக மாநிலம் கே.ஜி.எஃப் பகுதியில் உள்ள லாட்ஜில் தங்கியிருந்தது தெரியவந்துள்ளது. அங்கிருந்து காரில் புறப்பட்ட கும்பல் சுங்கச்சாவடி வழியைப் பயன்படுத்தாமல் திருவண்ணாமலைக்கு வந்து கொள்ளை திட்டத்தை அரங்கேற்றிவிட்டு மீண்டும் அதே வழியில் பணத்துடன் தப்பியது தெரியவந்தது.

அவர்கள் தங்கியிருந்த லாட்ஜை கண்டுபிடித்த தனிப்படையினர், விசாரித்தபோது கடந்த 12ஆம் தேதி காலை 11 மணிக்குத் தான் கொள்ளை கும்பல் கேஜிஃப்-ல் இருந்து புறப்பட்டுச் சென்றது தெரியவந்தது. அவர்களை யார் தங்க வைத்தது என்பது குறித்து அருகிலிருந்த தேநீர் கடையில் ஒருவரின் அடையாளம் கிடைத்துள்ளது. மேலும் அவருக்குப் பல வழக்குகளில் தொடர்புள்ளது தெரியவந்தது.

இதையடுத்து அந்த நபரைச் சுற்றிவளைக்க முயன்றபோது சுதாரித்துக்கொண்டவர் தனது செல்போன் இணைப்பைத் துண்டித்துவிட்டுத் தலைமறைவாகி விட்டார். இதையடுத்து, அவரின் உறவினர்களைப் பிடித்து தனிப்படையினர் விசாரித்து வருகின்றனர். அவரை பிடித்தால் மட்டுமே கொள்ளையர்கள் யார்? எந்த பகுதியைச் சேர்ந்தவர்கள்? என்பது குறித்த முழு விவரம் தெரியவரும் என கூறப்படுகிறது.

ஏறக்குறைய குற்றவாளியை நெருங்கிவிட்டதால் நூலிழையில் தப்பிய அந்த நபரைப் பிடிக்க வேலூர் மாவட்ட காவல் கண்காணிப்பாளர் ராஜேஷ் கண்ணன் தனிப்படை அமைத்து கே.ஜி.எப்-ல் முகாமிட்டுள்ளார். மேலும், அந்த நபரின் குற்ற வழக்கு பின்னணி குறித்தும் விசாரித்து வருகின்றனர்.

இதையும் படிங்க: தஞ்சையில் ஆன்லைன் மூலம் ஹைடெக் விபச்சாரம்.. 2 பெண்கள் உட்பட மூவர் கைது!

ABOUT THE AUTHOR

...view details