வேலூர்: வேலூர் மாநகராட்சியின் மாதாந்திர மாமன்ற உறுப்பினர்கள் கூட்டம் இன்று (ஜன.12) நடைபெற்றது. இதற்கு மேயர் சுஜாதா, துணை மேயர் சுனில் மற்றும் ஆணையர் ஜானகி தலைமை தாங்கினர். இதில் மாமன்ற உறுப்பினர்கள் கலந்து கொண்டனர். அப்போது ஒன்றாவது மண்டல குழு தலைவர் பேசுகையில், "எனது மண்டலத்தில் பணிகள் முறையாக மேற்கொள்ளப்படவில்லை, மின் விளக்குகள் முறையாக பராமரிக்கப்படுவது இல்லை" என கேள்வி எழுப்பினார்.
இதற்கு பதில் அளித்து பேசிய மேயர் சுஜாதா, "ஒரு ஆளும் கட்சி உறுப்பினரே எதிர்கட்சி போல் எப்போதுமே திமுக அரசை குறை கூறி பேசி வருகிறார். அரசை அவமானப்படுத்துவது போல் பேசுகிறீர்கள், இது சரியல்ல" என்றார். இதனைத் தொடர்ந்து இருவருக்கும் இடையேயான வாக்குவாதம் முற்றியதால் அவையில் கூச்சல் ஏற்பட்டது. பின்னர் தனக்கு அவையில் உரிய மரியாதை இல்லை என வெளியேற முயற்சித்தார்.
பின்னர் ஒன்பதாவது வார்டு அதிமுக உறுப்பினர் ரமேஷ் பேசுகையில், "எனது வார்டில் 2 கோடி ரூபாய் வரை வரி வசூல் செய்யப்படுகிறது. ஆனால் இதுவரை இரண்டரை ஆண்டுகளாக எவ்வித பணிகளும் மேற்கொள்ளப்படவில்லை. மேயரை கேட்டால் குழந்தை மாதிரி நடந்து கொள்கிறார். மாற்றி மாற்றி பதில் சொல்கிறார். இரண்டரை ஆண்டு ஆகியும் புதியதாக வந்த மேயர் அப்படியே தான் இருக்கிறார்" என பேசினார்.